Naduh mynta ka sngi, Yn shongthait shipor ki ASHA na ka kam khlem pud sngi

Shillong, K’Lyngkot 07: Ki hynniew hajar ngut ki nongtrei ASHA ka jylla Meghalaya kiba don hapoh ka shatri Meghalaya Asha Worker Union (MAWU) hadien ka jingsngap jar ka sorkar halor ka jingsiew katkum ka jingtrei ban ai mynsiem ne ka (Incentive) kila rai ban shongthait khlem pud sngi na ka kam tad haduh ba ka sorkar kan kular sha ki lyngba ka jingthoh.
Haba ïa kren bad ki lad pathai khubor ka nongai buit jong ka MAWU ka kong Soni Kharjana kala ong ba ïa kane ka rai la shim lang da ka kynhun hi baroh kawei bad kane ka jingsangeh nne shongthait ban trei ïa ka kam kan dei naduh ka 8 traik u Kyllalyngkot haduh ban da pyntip da ka sorkar halor katei ka jingsiew.
Ka Kong Kharjana kala pyntip ba ka kynhun ha ka 15 tarik u bnai Nohprah kala leit ban buh da ka jingthoh sha u Mission Director jong ka Naional Health Mission ban dawa ïa ka jingsiew hynrei ki khlem ïoh ka jubab ka shai.
“Ngi la shim noh ïa kane ka rai ban sangeh trei kam ne shongthait shwa shipor kaba khlem khlem buh sngi bad pyrshang ban leit bylla saitjain shwa shipor tad haduh ba ka sorkar da noh khubor ha kaba iadei bad ka jingdawa jong ki,” kala ong.
Ka Kong Kharjana kala iathuh ba naka liang ka MAWU kala dep ban ai por ïaka Sorkar Jylla haduh 19 tarik Nohprah 2025 ban ïakren bad ka Sorkar Pdeng halor ka jingslem ba kan pyllait ïaka jingsiew ki ban ai mynsiem ban treikam (Incentives).
Shuh shuh kala ïathuh ba ka jingshah leh bein eh kadei ha ri lum Garo bad bud pat sa ki District bapher bapher ha kaba ka jingsiew kaba dang sah jong ka jingsiew ha kaba kila don kiba khlem ïoh mynta la 5, 6, 7, 8 bnai na ki jaka ai jingsumar ha ki district.
Ka Kong Kharjana kala ïathuh ba ïa kane ka incentive ne ka jingsiew katkum ka jingtrei kadei ban siew da ka sorkar kmie, hynrei hangno ka sahkut pat kim don jingtip satia.
Haba kylli ka Kong Kharjana kala ong, “Wat lada ki don ki kam ba kyrkieh ne emergency ka MAWU kala rai ban shongthait beit na ka kam bad ban ym leit trei namar ba ïa ka jingdonkam ba kyrkieh jong ki ASHA ka sorkar kam peit ne patiaw”.
Shuh shuh ka kong Kharjana kala ong, Katba ka sorkar kam pat ai ktien halor ka jingshongthait jong ki na ka kam ba shipor kin ïai bteng ïa kane ka jingshongthait na ka jingtrei kam.