Somnath… Ka jingïohsngew ïa kane ka ktien ka wanrah ïa ka jingsngew sarong ha ki dohnud bad ki jingmut jingpyrkhat jong ngi. Ka long ka dak bymjukut jong ka mynsiem jong ka India. Kane ka Temple ka don ha ka thaiñ khap duriaw ha ka phang Sepngi jong ka ri India ha Gujarat, ha ka jaka kaba ki khot ka Prabhas Patan. Ka Dwadasha Jyotirling Stotram ka kdew ïa ki 12 tylli ki Jyotirling kiba don kylleng ka ri India. Ka Stotram ka sdang da “?????????????..”, kaba pyni ïa ka jinglong tynrai bad jing kongsan jong ka Somnath kum ka Jyotirling banyngkong.
La ong shuh shuh:
Kane ka mut: Tang ka jingïohi ïa u Somnath Shivling ka pynthikna ba u briew u lait na ka pop, u ïoh ïa ki jingthrang ba khuid jong u bad u poi sha bneng hadien ka jingïap.
Ka long kaba sngewsih ba kane ka Somnath, kaba ju khring ïa ka burom bad ki jingduwai jong ki million ngut ki briew, ka la shah hiar thma da ki briew nabar, kiba thmu ban pynpra, ym ban wan nguh.
U snem 2026 u long uba kongsan bha na ka bynta ka Somnath Temple. La dap 1,000 snem naduh ba la hiar thma nyngkong eh ïa kane ka jaka kaba kyntang. Dei ha u bnai Kyllalyngkot jong ka snem 1026 ba u Mahmud jong ka Ghazni u la hiar thma ïa kane ka Temple, da kaba thmu ban pynduh ïa ka dak kaba khraw jong ka jingngeit bad ka riti dustur, lyngba ka jinghiar thma kaba shyrkhei.
Hynrei hadien shi hajar snem, ka Tempi ka ïeng da kajuh ka burom kumba ju long namar ki jingpyrshang kiba bun ban pynphai biang ïa ka Somnath sha ka jinglong kaba khraw jong ka. Kawei na kum kine ki mawmer ka dap 75 snem ha u snem 2026. Dei ha ka jinglehniam ha ka 11 tarik u Jymmang 1951, ha ka jingdon lang u President jong ka ri India ha kata ka por, u Dr. Rajendra Prasad, ba la plie biang ïa ki jingkhang jong kane ka Temple ba la pynthymmai.
Ka jinghiar thma kaba nyngkong eh ïa ka Somnath shi hajar snem mynshuwa ha ka snem 1026, ïa ka jingleh beiñ ïa ki briew jong ka shnong bad ïa ka jingpynjot ïa kane ka jaka ba kyntang la buh jingtip ba bniah bha ha ki jingthoh histori bapher bapher. Haba pule ïa ki, u dohnud u pang. Kawei pa kawei ka laiñ ka kit ïa ka jingkhia jong ka jingsngewsih, ka jinglehbeiñ bad ka jingsngewsih ka bym lah ban jah noh wat hadien ba la ïaid ki snem.
Hato pyrkhat ïa ka jingktah ïa ka Bharat bad ïa ka jinglong jong ki briew. Namar, ka Somnath ka don ka jingmut kaba khraw ha ka liang ka jingngeit. Ka la don ruh ha rud duriaw, kaba ai bor ïa ka imlang sahlang kaba don ka jingstad kaba khraw ha ka ïoh ka kot, kaba ki nongkhaïi bad ki nongleit jingleit lyngba ki duriaw jong ka ki rah ïa ki khanatang shaphang ka jingkhraw jong ka shaduh sha jngai.
Hynrei nga sngew sarong ban pynpaw khlem jingartatien ba ïa ka jingïathuh khana shaphang u Somnath, shihajar snem hadien ka jingshah thombor kaba nyngkong, ym shym la batai da ka jingpynjot. La batai ïa ka da ka jingshlur bym lah pynduh jong ki klur ngut ki khun jong u Bharat Mata.
Ka jinglehriew khlaw ha ka por hyndai kaba la sdang shihajar snem mynshuwa ha u snem 1026 ka la nang ‘ai mynsiem’ ïa kiwei pat ban hiar thma biang ïa ka Somnath. Ka la long ka jingsdang jong ka jingpyrshang ban pynlong mraw ïa ki briew bad ka kolshor jong ngi. Hynrei, man la ka por ba la thombor ïa ka Temple, ngi la don ruh ki shynrang bad kynthei kiba khraw kiba la ïeng ban ïada ïa ka bad wat kiba la aiti ïa la ka jingim. Bad man la ka por, pateng hadien pateng, ki briew jong ka imlang sahlang kaba khraw jong ngi ki khie biang, ki tei pat bad pynthymmai ïa ka Temple. Ka long ka kabu jong ngi ban shah pynsan ha kajuh ka khyndew kaba la pynsan ïa ki riew khraw kum u Ahilyabai Holkar, uba la pyrshang da kaba donburom ban pynthikna ba ki nongmane kin ïoh ban duwai ha Somnath.
Ha ki snem 1890, u Swami Vivekananda u la leit jngoh ïa ka Somnath bad kata ka jingjia ka la pynkhih ïa ka mynsiem ïa u. U la pynpaw ïa la ka jong ka jingsngew ha ka por ba u ai jingkren ha Chennai ha u snem 1897 haba u la ong, “Katto katne na kine ki temple barim jong ka thaiñ shathie jong ka ri India kum ka Somnath jong ka Gujarat kin ai ïa phi shibun ki jingstad, kin ai ïa phi ïa ka jingshemphang kaba kham jylliew shaphang ka histori jong ka jaitbynriew ban ïa kino kino ki kot. Peit kumno kine ki temple ki don ki dak ki shin jong ki spah tylli ki jinghiar thma bad ki spah tylli ki jingkhie biang ha kaba la pynjot bad la mih biang na ka jingshah pynpulom, ha kaba la mih biang ka jingkhlaiñ kumba ju long! Kata ka dei ka jingmut jingpyrkhat jong ka ri, kata ka long ka tynrai jong ka ri. Bud ïa ka bad ka ïalam sha ka burom. Kyntait noh ïa ka bad phin ïap; ka ban wan ka dei tang ka jingïap, ka jingpynjot, tang kawei ka jingktah, ha ka khyllipmat ba phi ïaid lait ïa kata ka tynrai jong ka jingim.”
Ka kamram ba kyntang ban tei pat ïa ka Somnath Temple hadien ka jinglaitluid ka la hap ha ki kti ba tbit jong u Sardar Vallabhbhai Patel. Ka jingleit jngoh ha ka por Diwali ha u snem 1947 ka la ktah ïa u haduh katta katta ba u la pynbna ba yn tei pat ïa ka Tempi hangta. Khatduh eh, ha ka 11 tarik u Jymmang 1951, kawei ka Temple kaba heh ha Somnath ka la plie ïa ki jingkhang jong ka sha ki nongmane bad u Dr. Rajendra Prasad u la don hangta. U Sardar Sahib um shym la im ban ïohi ïa kane ka sngi kaba sah ha ka nam, hynrei ka jingpyndep ïa ka jingangnud jong u ka la paw ha khmat ka ri. U Myntri Rangbahduh ha kata ka por, u Pandit Jawaharlal Nehru, um shym la sngewtynnat than ïa kane ka jingjia. Um kwah ba u President ba donburom bad kumjuh ruh ki Myntri kin ïasoh bad kane ka jinglehkmen kaba kyrpang. U la ong ba kane ka jingjia ka la wanrah ïa ka jingsngew sniew ïa ka ri India. Hynrei u Dr. Rajendra Prasad u la ïeng skhem bad kaba sah ka long ka histori. Ym don kano kano ka jingkren shaphang na ka Somnath kaba pura khlem da pynkynmaw ïa ka jingpyrshang jong u KM Munshi, uba la kyrshan bha ïa u Sardar Patel. Ki jingthoh jong u shaphang ka Somnath, kynthup ïa ka kot, ‘Somanatha: The Eternal Shrine’, ki long kiba ai jingtip bad ai jinghikai shisha.
Shisha, kumba ong ka kyrteng jong ka kot jong u Munshi Ji, ngi long ka riti dustur kaba kit ïa ka jingsngewskhem shaphang ka jinglong bymjukut jong ka mynsiem bad jong ki jingmut jingpyrkhat. Ngi ngeit skhem ba kata kaba ym jukut ka long kaba ym lah ban pynjot, kumba la batai ha ka dkhot Gita “???????????????????…”. Ym lah ban don ka nuksa kaba kham bha jong ka mynsiem bym lah pynrem jong ka imlang sahlang jong ngi ban ïa ka Somnath, kaba ïeng donburom, kaba jop ïa ki jingeh bad ki jingïaleh.
Ka dei kane kajuh ka mynsiem kaba paw ha ka jaitbynriew jong ngi, kawei na ki jaka ba shai tam jong ka jingroi ha ka pyrthei, hadien ba ka la jop ïa ki jingwan hiar thma bad jinglute jong ki nongsynshar phareng da ki spah snem. Ki dei ki rukom kheiñ kor jong ngi bad ka jingkut jingmut jong ki briew jong ngi kiba la pynlong ïa ka India kum ka jaka ba ka pyrthei baroh kawei ka peit mynta. Ka pyrthei ka ïohi ïa ka India da ka jingkyrmen. Ki kwah ban bei tyngka ha ki samla kiba stad jong ngi. Ka jingsaiñdur, ka kolshor, ka jingrwai bad katto katne ki tamasa jong ngi ki ïaid sha kylleng ka pyrthei. Ka Yoga bad ka Ayurveda ki ktah ïa ka pyrthei baroh kawei, ki kyntiew ïa ka jingim kaba koit ba khiah. Ki lad ki lynti ban weng ïa ki katto katne ki jingeh kiba jur bha ha ka pyrthei ki wan na ka ri India.
Naduh ki por hyndai, ka Somnath ka la pynïasoh lang ïa ki briew na ki bynta bapher bapher jong ka jingim. Da ki spah snem myn shuwa, u Kalikal Sarvagna Hemchandracharya, u riewkhuid Jain uba don burom, u la wan sha Somnath. La ong ba hadien ba u la duwai hangta, u la pule ïa kawei ka dkhot, “????????????????????????????????????. Ka mut – Ki jingai khublei ïa Uta Uba la pynduh noh ïa ki symbai jong ka rong pyrthei, ha Uba ka jingkwah bad ki jingjynjar baroh ki la kut noh.” Mynta, kaSomnath ka bat ïa kajuh ka bor ban khyllie im ïa kaei kaei kaba jylliew hapoh ka jingmut jingpyrkhat bad ka mynsiem.
Shihajar snem hadien ka jingshah thombor kaba nyngkong ha u snem 1026, ka duriaw ha Somnath ka dang khih da kajuh ka jingkhlaiñ kumba ka ju ïohi ha kito ki por. Ki um kiba saitia ki rud duriaw jong ka Somnath ki ïathuh ïa ka jingïathuh khana. Wat la ka long kumno kumno ruh, kumjuh kum ka um, ka la nang kiew biang man ka por.
Ki nonghiar thma jong ki por mynshuwa mynta ki long kum u shyiap uba shah kit ha ka lyer, ki kyrteng jong ki ïasoh lang bad ka jingpynjot. Ki long ki jingthoh ba rit ha ki kot lyngkdop jong ka histori, katba ka Somnath ka ieng skhem, ka pashat ïa ka jingshai sha ki jaka kiba jngai, ka pynkynmaw ïa ngi ïa ka mynsiem bymjukut kaba la sah khlem da pynduna namar ka jingshah thombor jong u snem 1026. Ka Somnath ka long ka jingrwai jong ka jingkyrmen kaba ïathuh ïa ngi ba katba ka jingshun bad ka jingshitrhem ha ka niam ka lah ban don ïa ka bor ban pynjot shipor, ka jingngeit bad ka jingskhem jingmut ha ka bor kaba bha ka don ïa ka bor kaba sah junom.
Lada ka Somnath Temple, kaba la shah thombor shihajar snem mynshuwa bad kaba la ïakynduh ïa ki jingshah thombor ba lah ban bteng biang bun bunsien, te ka long kaba thikna ba ngi lah ban pynphai biang ïa ka ri kaba khraw jong ngi sha ka burom kaba ka la ïohi shihajar snem mynshuwa shuwa ki jinghiar thma. Da ka jingkyrkhu kyrdoh jong u Shree Somnath Mahadev, ngi ïaid shakhmat da ka jingkut jingmut kaba thymmai ban tei ïa ka Viksit Bharat, ha kaba ka jingstad jong ka riti dustur ka ïalam ïa ngi ban trei na ka bynta ka bha ka miat jong ka pyrthei baroh kawei. Jai Somnath!
(U Narendra Modiu dei u Myntri Rangbahduh jong ka ri India bad u dei ruh u Chairman jong ka Shree Somnath Trust).
