Tang mar ïapdiang ïa u snem thymmai, bteng ki Pulit ri Bhoi ban pyrkhing ïa ki kali ba pynkheiñ aiñ

Nongpoh, K’lyngkot 03: Kum ka thong ban bteng ïa ka jingshakri na ka bynta ban wan rah ïa ka jingshngaiñ ïa ki paidbah nongleit nongwan ha ka surokbah National Highway-6 ha Ri Bhoi ba bun ki jingjia ba sngewsih ki ju jia tang na ka daw ka jingbym burom ïa ki kyndon aiñ ñiah kali, ki Pulit Traffic ka Nongpoh Branch hynnin ka janmiet ki la bteng biang ban talasi ïa ki kali kiba pynkheiñ aiñ bad kiba ym bud satia ïa ki kyndon aiñ ñiah kali.
Kum ban pynkynmaw, dang ha ka miet jong ka 31 tarik u Nohprah 2025 ki Pulit ki la pynlong ïa ka jingkhynra naphang ïa ki Kali ha sor Nongpoh shi bynta ban tehlakam ïa ki Kali ba kim dei ban ñiah khlem akor bad ban nym mih kino kino ki jingjia ba sngewsih ha ka jingpdiang ïa u snem thymmai, hynrei hadien ba la pdiang ïa u snem thymmai ki Pulit Traffic ka Nongpoh Branch ha ka janmiet jong ka 2 tarik u Kyllalyngkot 2026 ki la pynlong biang ïa ka jingkhynra kali ban bteng ïa ka jingtehlakam ïa ki Kali ba pynkheiñ aiñ.
Ïa kane ka jingkhynra Kali la pynlong ha ka surokbah National Highway-6 ha Nongpoh pyrshah bad ka ophis u Deputy Commissioner ka Ri Bhoi, ha kaba ki Pulit ki la bat naphang ïa ki Kali kiba pynkheiñ aiñ bad ki kali ba la bat da ki Pulit ki kynthup ïa ki Nongñiah Kali ba bauaid, ki Kali ba tah ïit ïong, ki Kali bym deng seat belt bad ruh ki Kali ar shaka kiba ym deng Helmet bad kiwei kiwei kiba pynher sted ïa ki Kali.
Kumba ha u snem 2025 baroh shi snem, ki Pulit ka Ri Bhoi ki la shim khia bha ban tehlakam ïa ki Kali ba pynkheiñ aiñ bad la sakhi ruh ba wat ki jingjia ba sgnewsih ki la duna bha kum ka jingïatyngkhuh kali, ka jingmynsaw bad ka jingiap briew ha kane ka surokbah bad mynta u snem thymmai ruh ki Pulit ka Ri Bhoi ki la buh biang ïa kajuh ka thong ba kin nym map ïa kino kino ki Kali ba pynkheiñ aiñ kaba dei na ka bynta ka jingshngaiñ ki paidbah.
Kumba la ioh lum jingtip, ha kane ka jingkhynra kali kaba tang hapoh ka shi kynta, ki Pulit Traffic ka Nongpoh Branch ki la ioh ban dain kuna haduh T. 10 hajar tyngka na ki Kali ba pynkheiñ aiñ bad na ka liang ki Pulit ki la rai ruh ba ha une u snem thymmai kin dang pynjur ïa ka jingkhynra Kali, ha kaba ka thong kaba hakhmat eh ka long ban pynduna ïa ki jingjia ba sngewsih bad ruh ban shngain ki paidbah nongleit nongwan lyngba kane ka surokbah ha Ri Bhoi District.