Pynskhem u Bah Charles Marngar ïa ki nongïalam ka WORD, ka Kynhun Seng ki Longkmie ha Ri Bhoi
Nongpoh Nohprah 22 : Ka Women Organisation Of Ri Bhoi District (WORD) kum kawei na ka kynhun treikmon sngewbha ki Longkmie ha Ri Bhoi bad la seng ruh da u (L) Dr. D.D Lapang dang shen ki la lah ban pynthymmai ïa ki nongïalam bad ruh ban pynskhem syndon kum kita ki nongïalam ba pura ha ka jingïalang kaba la pynlong ha Dorbar Hall Sajer Nongpoh.
Ki nongkitkkam kane ka WORD ba la pynskhem mynta ka sngi da u MLA ka Mawhati u Bah Charles Marngar kum u kongsan ki kynthup ïa ar ngut ki Adviser u Bah Kyrmenlang Uriah bad ka Kong Reviewlet Kylla bad la jied President ïa ka Kong Mirajune Marsing, General Secretary ka Kong Irine Moksha lem bad kiwei kiwei ki dkhot bad ki nongïalam kane ka kynhun.
Kum ban pynkynmaw, ïa kane ka kynhun ki Longkmie na Ri Bhoi ba la tip kum ka Women’s organisation of Ri Bhoi District (WORD), la Seng ha u snem 2015 da u Dr. D.D Lapang u ba dei u MLA barim ka Nongpoh Constituency bad u ba dei ruh Myntri Rangbah barim ka jylla u ba la bam kwai ha dwar u Blei ha iingsah jong u ha Nongbah Shillong, ha ryngkat ki katto katne ki Riewrangbah kiba kynthup ruh ïa u Bah Charles Marngar, u Bah Kyrmenlang Uriah nalor kiwei pat ki Riewrangbah.
Kane ka kynhun Seng ki Longkmie shi por ka la kynjah noh ha ka jingtreikam, kaba dei ruh hadien ka jingkhlad noh ka Kong J.J Kylla kum ka President bad ban dang pyntyllun ïa ki kam shakri, kane ka seng ka la pynthymmai biang ïa ki nongïalam na ka bynta ban kit ban bah ïa ka lyngkor nongïalam ban phai khmat kyrpang sha ki Longkmie bad ruh sha ki paidbah ka them Ri Bhoi.
Lyngba jong kane ka sngi, kum ka dak ka jingburom ïa u (L) Dr D.D Lapang uba dei u Nongseng jong kane ka Khynun bad ka kong (L) J.J Kylla kum ka President barim, na ka liang kane ka kynhun mynta ka sngi ki la pynlong ruh ïaka jingsngap jar ba Shipor, bad ha kane ka juh ka sngi na ka Liang kane ka Khynun ka la sam ruh da ki jain kup syaid sha ki para longkmie kaba long kum ka dak ka Jingai sngewbha Christmas.
Na ka liang u Bah Charles Marngar kum u MLA bad u kongsan jong kane ka sngi, u la bret ruh ïa ki symboh pyrkhat sha ki nongïalam ba thymmai kane ka kynhun, kaba dei hadien ka jingpynskhem ba kin dang shim ïa kata ka jingkitkhlieh ban pyntyllun ïa ka kam na ka bynta ban shakri kyrpang ïa ki Longkmie bad ruh ïa ki paidbah ka them Ri Bhoi.