Mawkyrwat, Nohprah 15 : U Deputy Commissioner & Chairman jong ka District Disaster Management Authority (DDMA), South West Khasi Hill District u la pynmih ïa ki jingbthah haba pluh Ding: ‘Kiba dei ban leh bad bym dei ban leh’ ne ki ‘DOS & DON’TS ON FIRE’.
La kyntu jur ïa ki nongshong shnong ba kin long kiba husiar bad bud ïa ki jingbthah ban pynthikna ïa ka jingshngaiñ jong ki bad ka jingshngaiñ jong kiwei pat: kata Phone sha ka ophis jong ka jingpynlip ding (Fire Station) bajan tam mar syn ïohi ïa ka jingsdang ka jingpluh ding. Pyntip ruh sha ka District Control Room, wat ym ailad ïa ki khyllung khynnah ban lehkai bad ki jingpruid ne jingtbeh ding, lada ki jaiñ-phong jong phi ki kem ding, wat mareh. Pyntyllun ïa lade ha madan ban pynlip ïa ka ding. Kynmaw lada ki jaiñ-phong jong kiwei pat ki kem ding, ngim dei ban theh da ka um.
Nangta, ha ka por shet jingshet, wat phong ki jaiñ kiba lah ban kem ding kloi kum ki nylon. Pynlip bha ïa ka ding hadien ba la dep shet, ïa ki umphniang ne tiar ba lah ban kem ding kloi kum ki umphniang sharak, ki skum, ne ki dieng ïap, dei ban buh kham jngai na ka dpei ne shaw-la, lada ka kamra ka dap da ka tdem, par sha ka jingkhang bad ka khlieh jong phi ka dei ban don kumba shi phut ne ar phut na madan khnang ba phin ym ïap-op.
Shuh shuh, wat bret kulmar ïa ki biri ne sikret ba deng meh ding, dei ban buh lypa ïa ka borti ba la pyndap da ka um ne u shyiap bad ki siej kiba jrong hajan khamtam ha ka por ba pynbthei ïa ki pataka (Fire Crackers) kum ha ka por diwali ne New Year bad kumta ter ter, pynlip noh ïa ki klong ne khiew gas (Cylinder) bad stove hadien ba la dep pyndonkam ïa ki. Dei ban bud thikna ïa ka jingbatai kumno ban pyndonkam bad pynlip ïa ki ruh.
Ym tangkata, u Deputy Commissioner & Chairman jong ka District Disaster Management Authority (DDMA), South West Khasi Hill District u la buh ruh ki number phone khnang ba ki paidbah ki dei ban pyntip lada don ki jingjia kata ha District Emergency Operation Centre – 03656-295031, ha Fire & Emergency – 8729832630, ha Mawkyrwat C&RD Block – 8787861965, ha Ranikor C&RD Block – 8787738454 bad NERS/ERSS – 112.
