Plie u Myntri Rangbah ïa ki jingtei ban khring ïa ki kam jngohkai sha ka Shad Nongkrem

Shillong, Nohprah 10: U Myntri Rangbah ka jylla u Conrad K Sangma ha ka sngi Balang u la plie ïa ka jingtei kiba dei ki lad pynroi lyngba ka kolshor bad ki kam shakri ha ka kam jngohkai na ka bynta ka shad Nongkrem ha Lum Pomblang bad Madan Syiem, Smit bad pynpaw ka jingdonkam ban pynneh pynsah ban kyntiew bad tyngkai ïa ka jinghiar pateng jong ka kolshor jong ka jylla.
Haba phai sha ka jingwan jngoh ba nyngkong sha kane ka jaka ha hadien ki 3 snem shiteng, hadien ba u la sakhi ïa ki jingriewspah ki jingleh niam jong ka Nongkrem Dance-u Sangma u la pynpaw ba wat hadien ba da ki phew snem ba la ïoh ïa la ka jong ka jylla, ka jingithuh ïa ka kolshor jong ki jait bynriew riewlum ki khlem da la ïoh ka jingpynneh bad tyngkai kaba pura.
“Nga sam ïa kane ym kum ka jingkynthoh pynrem hynrei kum ka jingpynpuson. Ha kata ka khyllipmat, nga sngew khlaiñ ba ïa kane donkam ban wanrah ka jingkylla. Nga la shim ka rai ba ngin leh katba lah bad shim, ban ai ka burom ïa la ka riti dustur bad ka kolshor jong ngi, ban ïada, ban pynneh pynsah bad ban kyntiew ïa ki,” u la ong.
U la pynpaw ka jingkmen ha ka jingsakhi ïa ka jingjop kaba pura jong ka project bad kdew ruh ba ka kam pynroi kan pynïar shaduh ka madan shad, da kaba kyntiew ïa ki kam ban pynbha ki ban jia ha ki thaiñ kiba marjan ba kynthup ïa ka Madan Syiem bad kiwei ki madan shnong.
Haba pynskhem ïa ka rai jong ka sorkar ki la ïaid da ki jingdonkam, ka jinglong hok, ka jingbit jingshai, u la kdew ïa ki jingthmu ka sorkar jong u ban pynpoi ïa ki kam shakri da ki paidbah ha kiine ki 7 snem shiteng bad kumjuh ruh ha baroh ki kylleng jong ka thaiñ bad ki niam.
U Myntri Rangbah u la pynpaw ruh ïa ka jingdon ka jingiaphiah ha ka imlang sahlang, da kaba kyntu ïa ki paidbah ban kynriah sha lyndet jong ka jinglong shilliang ha ka thaiñ hynrei ban kdup ïa ka jingïalong kawei.
“Na ka bynta ka jylla ba kan roi ka kan kiew ngi hap ban ïaid shakhmat ha ka jingïalong kawei bad kaba kynthup lang da kaba pynthikna ïa ki jingmyntoi kiba wan na ka bynta jong manla uwei pa uwei,” u la ong.
U la banjur shuh shuh ba ki kam jingkiew shaphrang dei hi ban thew da ki kam kiba lah ban ktah ïa ka jingim jong ki paidbah.
Haba pynshlur ïa ki cultural programme, u Myntri Rangbah u la ong ba kum kine ki jingsdang kin pynpaw ïa ka jingbun ki jaitbynriew ha ka jylla, ban kyntiew ïa ki kam jngohkai, ban pynkhlaiñ ïa ka ïoh ka kot ha ki shnong ki thaw bad kumjuh ruh ban pynneh pynsah ïa ka hiar pateng ka kolshor.
Shuh shuh, u la pynskhem ïa ka jingkwah jong ka sorkar ban bteng ka jingkyrshan ha ka kam ai jingshakri ha ka koit ka khiah, ki kam ïalehkai bad kiwei kiwei ki kam.
Haba kren ha kane ka sngi pat u Symbud Myntri Rangbah u Bah Prestone Tynsong u la kdew ïa kane ka jingsdang kaba phai sha ka jinglong nongïalam.
Shuh shuh u Symbud Myntri Rangbah u la pyntip ruh ba ka sorkar ka thmu ban pynitynnad ïa ka Ïewduh Market khnang ba kan khring ia ki nongwan jngohkai.
Ha kane ka sngi la ïoh ruh ka jingkren na u CEM arim ka KHADC Bah Pyniaid Sing Syiem.
Ha kajuh ka por u Syiem ka Hima Khyrim, Dr. B. S. Syiem, u la ong ba kine ki jingtei ki long ka jingmih na ki jingpyrshang lang jong ka Hima bad kumjuh ruh u la pynpaw ka jingïaroh ïa ka sorkar halor kane ka jingïarap kaba long ha ka por kaba biang.
La ïoh ruh ka jingkren na u Sordar ka Smit, Bah P Nongbri nalor kiwei kiwei.
U Sordar u la pynpaw ïa ka jingdonkam jong ka shnong haba ïadei bad ka football stadium, ka jingkyntiew ïa ka Smit PHC, ka jingpynbha ïa ka Smit College bad kumjuh ruh ka pule puthi bad ka bha ka miat ki samla nongkyndong. Ha kane ka sngi ki la don ki programme bapher bapher ba la wanrah da ki samla pule ka Smit Higher Secondary School bad Smit College.