Ym na ka MLA Scheme nga ai hynrei na ka tulop lajong nga sei ban ai sha ki paidbah : Pius Marweiñ

Mawkyrwat, Nohprah 08 : U bah Pius Marweiñ uba dei MLA/MDC ka Ranikor Constituency, mynta ka sngi ka lah Sngi U Blei ka 8 tarik u Nohprah, 2025 kum ka jingaisngewbha khristmas sha ki shnong hapoh jong ka Ranikor Constituency da lade ula hiar sha ki 226 tylli tam ki shnong ban leit sam ïa ki jingaisngewbha da ki tiar.
Lah ban kdew ba ka jingleit sam jong u ïa ki tiar, ka long hadien ba ki paidbah ki la dep ban pynsngew ha u na ka bynta ki jingdonkam jong ki paidbah bad ha kane ka jingsam ym tang ki nongkitkam ne ki nongkyrshan jong ka party ki la sakhi hynrei da ki paidbah jong ki shnong bapher bapher ha ryngkat ki Sordar, ki Secretary Shnong na ki 226 tylli tam ki shnong, ki longkpa, ki longkmie bad ki samla.
Ïa kine ki jingaisngewbha, ym dei na kano kano ka bhah mang pisa na ka MLA Scheme hynrei ka dei na ka pla lane na ka tulop ba ma u u la buh kyrpang hadien ba ki paidbah ki la dep ban pynsngew ha ki sngi ba la dep.
Haba kren ha ka jingïalang, u bah Pius Marweiñ u MLA ka Ranikor Constituency, u la ïathuh ba kine ki jingaisngewbha sha ki paidbah kam dei na kano kano ka bhah kyrpang jong ka MLA Scheme hynrei ka dei lyngba ka tulop ba ma u hi u la buh kyrpang hadien ba ki paidbah jong ka konstitwensi ki la phah ïa ki jingthoh ban pan jingïarap na ka bynta ki jingdonkam jong ki namar tang na ka bhah jong ka MLA Scheme kan nym dap satia ïa baroh ki paidbah nongshong shnong kiba hapoh jong ka Ranikor Constituency.
Kumta u la ong ba lyngba kine ki jingaisngewbha da ki spon, ki paidbah jong ki 226 tylli ki shnong hapoh ka konstitwensi kin sa ïoh pyndonkam ïa ki la ka long lada ki don ki jingkhawai ïathoh, khawai ha ki jingïaseng jong ki Balang, khawai dap snem bad jingkhawai ïap briew ruh. Ym tangkata, u la maham ruh ba lada kin buh ha ki shnong ne ha ki seng longkmie ne ha kino kino, da lei lei kita ki nongsumar kin dei ban buh da ka dor hynrei kin shim na kita ki nongpyndonkam tang kum ka jingaisngewbha ne ka donation namar la ai khnang ïa kine ki tiar kham kyrpang eh ba kito ki longïing kiba kham shem jingjynjar ha ki jingdon ki tiar shet tiar tiew kin ïoh ban shim bad pyndonkam ha ki jingjingdonkam jong ki.
Namarkata, u la buh ka jingkyrpad ïa ki paidbah ba haba ki la ïoh ïa kine ki tiar ki dei ban sumar bha ïa ki bad ki dei ban pyndonkam hok ha ka rukom kaba dei khnang ba kin neh ym tang shi snem ar snem hynrei kin neh da ki phew phew snem. “Ïa kine ki jingaisngewbha, nga ai sha phi ki shnong hapoh jong ka Ranikor Constituency kum ka jingaisngewbha khristmas bad to U Blei Un don ryngkat lem bad phi ha kane ka jingrakhe lehkmen bad u snem thymmai ba suk ba kmen ïa phi ki paidbah jong ka Ranikor Constituency”, ong u bah Pius Marweiñ.