Nongpoh, Nohprah 03 : U District Magistrate ka Ri Bhoi mynta ka sngi u la pynmih ïa ka hukum na ka bynta ban pyntreikam ïa ka hukum ka Meghalaya High Court kaba dei katkum ka PIL NO.2 jong u snem 2021 ba la ujor da ka Gau Gyan Foundation ban khang pyrshah ïa baroh ki jaid dukan die doh kiba ym tap satia ha ka por ba ki die ha ki dukan.
Lyngba kane ka hukum la bthah jur sha baroh ki dukan doh kiba die doh ha ki iew ki hat ba ki hap ban tap ïa ka doh bad lait noh kito ki doh kiba dang im kaba ki hap pat ban lehkhuid bad ban sait ïa ki dukan bad ruh ban deng da ki jingdeng kti khnang ba kan nym pynjaboh ïa ka doh.
Lyngba kane ka hukum la bthah ruh sha baroh ki nongdie doh paidbah ba ki hap ban bud ryntih katkum ka Prevention of Cruelty to Animals (Regulations of Livestock Market) Rules, 2017 bad kino kino kiba ïaleh pyrshah ki shah pynshitom katkkum katei ka kyndon aiñ. La pyntip ruh ba kane ka hukum kan treikam mardor bad kan dang ïaid treikam tad haduh ban da pynbna pat da kumwei.
