Cooch Behar Trophy: Ryngkat ka jingkyrmen pynkut ka M’laya ïa ka sngi ba nyngkong pyrshah ïa ka Arunachal

Shillong, Nohprah 01: Ka Meghalaya ka don ha ka jingkyrmen kaba skhem watla ka la shah pynkhyllem noh baroh ki wiket ha ka sngi nyngkong jong ka jingïakhun U-19 men’s Cooch Behar Trophy 2025-26 plate group pyrshah ïa ka Arunachal Pradesh ha MCA Ground hynne ka sngi Nyngkong.
Da kaba shimti ban tied nyngkong hadien ba ka Arunachal ka la jop ïa ka jingïakynting pisa (toss), ka Meghalaya ka la kamai 205 ron shuwa ban khyllem baroh ki nongtied (all out) bad nangta ka la pynduna ïa ka kynhun liang pyrshah sha ka 94 ron bad pynhap 6 wiket, kaba pynlong ïa ka kynhun ban lamkhmat da 111 ron.
Ha ka tied, baroh lait noh tang lai ngut ki nongïalehkai jong ka Meghalaya ki la lah ban kynjoh ïa ka phew ron hynrei ki nongkawang bol jong ka Arunachal ki la lah ban pynpra ïa ki jingïatreilang shuwa ba ka jingkheiñ kan kiew kham bun.
U Sameer Choudhury u la ïalam hakhmat eh napdeng ki nongtied da kaba kamai 28 ron naki 39 bol. Ka la don ruh ka khep ba ka Meghalaya ka la shah pynduna 5 wiket na bynta 108 ron shuwa ba u Gaurav Jyoti Thakuria (33 ron naki 76, 4x4s) un ïoh ka jingkyrshan na u Rudra Singh Rathore (42 ron naki 40 bol, 4x4s, 1×6).
U Gaurav bad u Rudra ki la noh synñiang 56 ron na ka bynta u wiket uba hynriew. Kiwei pat ki nongtied kiba bud kim shym la lah ban neh slem, watla katta ruh, ka Meghalaya ka la lah ban ïaid lait ïa ka 200 ron. Na ka bynta ka Arunachal, u nongkawang bol spin u Surya Singh u la long uba seisoh tam da kaba khur 4/39 ha ki 14.4 ober.
Katba ki nongtied ka Arunachal ki dang mih ban sdang ïa ka pali tied jong ki, ka Meghalaya ka la ai ïa ka bol thymmai sha u Pacer u Apandanka Marak bad u Leg Spinner u Mewankitbok Kharpuri.
Ka Arunachal ka la duh noh ïa u nongtied ba sdang jong ka, u Patey Tacha hadien ba u la shah pynhap ha u Mewankitbok (1/25 na ki 9.1 ober) ha ka ober kaba saw hynrei hadien kata ka la don ka jingïatreilang kaba 46 ron hapdeng u Nabam Rikam (26 na ki 45 bol) bad u Deepak Kumar Yadav (28 na ki 35). Ki la shah weng noh ha u Angkit Tamang (1/16 na ka 6) bad u Gaurav Narleng (2/20 na ki 6 ober), kaba la pynlong ïa ka Arunachal ban shah pynduna 6 wiket tang hapoh shispah ron.
Ki arngut kiwei pat ki nongkawang bol jong ka Meghalaya kiba la pyndonkam ha kane ka sngi ruh ki la kam wiket – U Benedict Jones Makdoh u la khur 1/15 ha ki 3 ober bad u Apandanka 1/17 ha ki 8 ober.