Jurip u Myntri ïa ka building ba dang shu dep thied ha Bangalore ban pynlong Meghalaya House

Nongpoh, Naiwieng 27: U Bah Sosthenes Sohtun Myntri ba dei peit ïaka tnad C&RD, GAD bad SAD ryngkat bad ki heh ophisar ka tnad PWD Building kila leit ban jurip ïakawei ka building kaba dang shu dep thied thymmai ha Bangalore ïa kaba ka sorkar ka thmu ban pynlong kum ka Meghalaya House, bad kumjuh ruh u myntri lem bad ka kynhun ophisar kila leit ruh ban jurip ïa kawei ka jaka ha Mumbai ba ka sorkar ka thmu ban thied ban tei sa kawei pat ka Meghalaya House namar ka jingkhapngiah kaba la don lypa.
Haba kren sha ki lad pathai khubor hadien ka jingjurip u Bah Sosthenes Sohtun u la ong ba ka sorkar ka don ïaka thong ban pynbiang ïaki Meghalaya House kiba don shabar jylla khnang ba ki briew na kane ka jylla kin suk haba ki leit sha kiwei ki jylla la ka long kiba leit pule, kiba shah sumar bad kiwei kiwei ki jingdonkam shimet bad dei halor katei ka nongrim ba ka sorkar kala dep ban thied ïa kawei ka building thymmai ha Bangalore naka bynta ka jingmyntoi ki paidbah ka jylla.
U la ong ruh ba nalor katei ka building thymmai kaba la dep ban thied ha Bangalore ka sorkar ka don ruh ka jingthmu ban thied jaka sa ha Mumbai ban tei pat sa kawei ka Meghalaya House namar ka Meghalaya House kaba don mynta kala khapngiah palat bad donkam sa kawei namar ka jingbun ki briew kiba leit sah ha katei ka jaka.
U la ong ruh ba kumba long mynta ka sorkar Meghalaya ka dang don hapdeng ka jingïakren bad ka sorkar Maharashtra ban ioh ïaka dor ba biang jong ka jkaka ha kaba naka liang ka tnad GAD kan sa phah da ka jingthoh khnang ba yn lah ban tei sa kawei ka Meghalaya House ha nongbah Mumbai.