Shah bat lang ka kali ba shong u MP Shillong , ïaroh ïa ki Pulit ka Ri-Bhoi

Nongpoh, Naiwieng 26 : U Dr Ricky AJ Syngkon MP ka VPP na Shillong Parliamentary Seat hynnin ka miet u la shah bat lang haki pulit ka Ri-Bhoi haka jingtalasi kali ha Byrnihat, katba u dang don ha lynti ban kiew sha nongbah Shillong hadien ba u la wanphai na nongbah Delhi lyngba ka kad liengsuiñ na Guwahati.
Na ka liang u Dr Ricky AJ Syngkon tang hadien ka jingshah pynsangeh haki pulit ka Ri-Bhoi ban pynlong ka jingtalasi u la hiar napoh ka kali ban ai khublei bad ai ka jingïaroh ïaka jingtreishitom jong ki pulit miet bad sngi ban pynthikna ïaka jingshngaiñ jong ki paidbah ba leit ba wan ha shilynter u surok bah khamtam haka por mynmiet, namar kampher la ki dei ki VIP, ki paidbah ne ki pulit ka aiñ ka hap ban long salonsar, namar teng teng wat ki pulit ruh ki bun kiba pynkheiñ aiñ.
Ha katei ka jingtalasi naphang ïaki kali hapoh ka jingïalam u Senior Superintendent of Police ka Ri-Bhoi u VS Rathore haka jingdonlang u Bah Orville Massar Additional SP lem bad ka kynhun pulit ryngkat ruh bad ki VDP ka shnong Lumnongthymmai Byrnihat la lap shibun ki nongpynkheiñ aiñ naduh kiba ñiah kali bad u bilor kyiad, kiba tah iit iong, kiba ñiah naka liang bym dei bad kiwei kiwei ha kaba ki pulit kila daiñ kuna naphang hadien ba kum ki pulit kila maham naka por shaka por ïaki paidbah ban burom ïaki aiñ ñiah kali.
Haba kren sha ki lad pathai khubor naka liang u Dr Ricky Aj Syngkong u la ïathuh ba u la shah bat lang ka kali bad ai khublei ïaka tnad pulit namar ki bat salonsar ïa baroh kampher la ki dei ki VIP namar kumba la sakhi ha kine ki sngi bala leit noh kala don ka jingpyndonkam bakla wat ïaka bor, bad kane ka jingleh ki pulit ka Ri-Bhoi ka dei kaba donkam eh katta katta namar kumba la sakhi dala ki jong ki khmat tang khyndiat por ba u la ieng ban sakhi lang ïa katei ka jingtalasi la lap shibun ki nongpynkheiñ aiñ khamtam kiba dih buaid kaba long ka jingma kaba khraw ïa ki paidbah ba leit ba wan ha shilynter u surok bah National Highway.
U la ong ruh ba kane ka jingtalasi kam dei ban long tang ha Ri-Bhoi hynrei ha kiwei kiwei ki district kin bud ïa kane ka nuksa namar ka dei ka kam kaba bha ryngkat ka jingkyrpad sha ki paidbah ba kin adkar ka ñiah kali khamtam hadien bala dep dih buaid bad kaei kaba ka tnad pulit ka leh ka dei shisha kaba dei ban ai ka jingïaroh namar ki kali pynkheiñ aiñ ym dei ban map.
Na ka liang u Dr Rikcy u la ong ruh ba kaei ba tnad pulit jong ka Ri-Bhoi ka leh ka dei ruh ka jingpynkynmaw ïaki nongshong shnong haka jylla bad ka ri India baroh kawei ba ka aiñ hi ka dei nka bynta baroh bad kumta donkam ban burom ïaka aiñ naka bynta ka jingbha lang jong baroh haka imlang ka sahlang.
Na ka liang u Bah Erimus Lamin kum uwei naki dkhot ka VDP jong ka shnong Lum Nongthymmai Byrnihat u la ong kum ka VDP ka ai ka jingïaroh ïaki pulit ka Ri-Bhoi kiba la shimkhia ban talasi naka por shaka por naka bynta ka jingshngaiñ jong ki paidbah bad ban ïatreilang bad ki VDP jong katei ka shnong hynnin ka miet kumba la sakhi haki por bala leit kila don shibun ki jingjia aksiden tang namar ka jingdih buaid bad lyngba kane ka jinghikai jong ki pulit kan ïarap ïaki paidbah ban don ka jingshngaiñ ha surok bah bad ban long adkar haba ñiah kali ban lait na kino kino ki jingjia ba sngewsih.