Mawkyrwat, Naiwieng 26 : Kum shibynta ban ai jaka sah shipor ïa ki briew kiba donkam ban sah miet lada ki wan donkam ne na kino kino ki kam hapoh ka South West Khasi Hills District, na ka liang ka Sumarsha Syiemlieh ryngkat bad ka ïing ka sem ki la ïoh ban plie paidbah ïa ka ïing sah miet ne lah ban ong ka ïing basa kaba kiba ki la ai kyrteng ka “Sumar Homestay” kaba don ha Laitlawsang, Jakrem, South West Khasi Hills District.
U kongsan ha kane ka sngi u dei u bah F.B. Basan, MCS, Additional Deputy Commissioner jong ka South West Khasi Hills District ha kaba u la khap ruh ïa u ribon kum ka dak ban plie paidbah ïa kane ka Himestay. Haba kren ha ka jingïalang u la pynpaw ka jingaikhublei ïa ka ïing ka sem jong ka kong Sumarsha Syiemlieh kaba la pyntreikam hok ïa ka bhah ba ki ki la ïoh na ka sorkar ha kaba ki la shna ïa ka ïing sah miet na ka bynta ki briew kiba donkam ban sah miet. Namarkata, kumba kane ka ïing ka sem jong ki ka la pyntreikam hok ïa ka bhah ba ki la ïoh, u la ai jingmut ruh ïa kiwei de ba haba ki ïoh ka bhah na ka sorkar ki dei ban long borabor kiba pyndonkam hok khnang ba kin long ki jingïarap bad jingmyntoi ym tang ïa ki hynrei na ka bynta kiwei de kiba donkam.
Lah ban kdew ba na ka liang jong ki trai jong ka Sumar Homestay ki la ai jingtip paidbah ruh ba hapoh kane ka jaka sah ki don ki jingthiah ba marwei, jingthiah ba ar ngut, ki Dormitory Beds, ka jaka jingbam, ki kamra ban pynlong jingialang ne kino kino ki jait jingkhawai, ka jaka ïeng kali, ki jaka leit shabar ba paka bad kumjuh ruh ka Free Wifi. Ym tangkata, kiba donkam ki lah ruh ban phun ha u +91-6909640650 /+91-8119905630.
Ïa kane ka Sumar Homestay la tei lyngba ka jingkyrshan pisa na ka Meghalaya Rural Bank ba la kyrshan ruh da ka District Commerce & Industries Centre Department bad ka Tourism Department kaba hapoh ka skhim Prime Minister’s Employment Generation Program ne PMEGP ha ka jingmang pisa kaba 10 lak tyngka.
Kiwei de kiba la ïa donlang ki long u bah M. War, General Manager jong ka DCIC, South West Khasi Hills District, u bah O.L. Passah, Superintendent jong ka Fisheries, South West Khasi Hills District, u bah D. Syngkon, District Sports Officer, South West Khasi Hills District ha ryngkat kiba la shah khot sngewbha.
