Ka jingkynnoh bam pisa ki Pulit na ki kali kit masi ka dei tang ka jingsngewthuh bakla: RBL&SA

Nongpoh, Naiwieng, 25: Hadien ka jingujor ka Ri Bhoi Livestock and Supplier Association (RBL&SA) sha u DC ka Ri-Bhoi halor jingkynnoh bam pisa ki pulit na ki kali kit masi, ki nongïalam katei ka kynhun ka mynta ka sngi ki la mih shakhmat ban pynshai paidbah ïa katei ka jingkynnoh jong ki ba ka dei tang ka jingsngewthuh bakla jong ki dkhot jong ki hadien ba kum ki nongïalam mynta ka sngi ki la leit ruh ban ïakynduh markhmat bad u Senior Superintendent of Police ka Ri-Bhoi District.
Haba kren sha ki lad pathai khubor hadien ka jingleit kynduh ïa u SSP, u Bah Pynshngaiñ Shylla u la ong ba ka jingkynnoh jong ki ïa ka jingbam pisa ki pulit na ki kali kit masi ka dei tang na ka daw ka jingbym wad bñiah bad ka dei tang ka jingpynsngewthuh bakla da ki dkhot ka seng.
U la ong ruh ba kane baroh ka mih dei hadien ka jingtalasi kali ki pulit ka Ri-Bhoi na ka por shaka por ha kaba ki la don ki kali kit masi kiba la shah daiñ kuna haki pulit, hynrei na ka liang ki pulit ki daiñ kuna naphang ïa ki kali kiba pynkheiñ aiñ bad ki bym don kot don sla bad kane ka long salonsar ïa baroh, hynrei ha kum katei ka por bun na ki kali ki la shah daiñ kuna kaba la pynlong ïa ki dkhot ban leit ujor sha u DC ka Ri-Bhoi namar ki la pynpaw ba bun na ki mrad ba ki kit ki dei ki mrad ot doh la ki dei ki sñiang, syiar ne masi.
Kum ka kynhun ki la pynpaw ruh ka jingsngewkmen kaba khraw hadien ka jingïakren sngewthuh jingmut bad u SSP ka Ri-Bhoi bad katei ka jingïakren ka la long kaba seisoh bad na ka liang u heh pulit ka Ri-Bhoi u la kular ruh ban ai ka jingïatreilang nangne shakhmat bad lada ki don kano kano ka jingeh ki dei ban pyntip sha ki pulit ym ban shu kynthoh kulmar.