Nongpoh, Naiwieng 25 : Ha ka prokram ai jinghikai ba la pynlong da ka tnad Ri Bhoi Police bad ryngkat ka Mahatma Gandhi University ban ai jinghikai kyrpang ïa ki samla pule halor ki kyndon jong ka Traffic Rules mynta ka sngi ha Nongpoh, ka la long shisha ka jingioh mynsiem ïa ki Pulit ka Ri Bhoi bad ïa ka tnad Pulit hi baroh kawei, namar na ka liang ki samla katei ka skulbah ki la ai ka jingkyrshan bad jingïaroh kaba khraw ïa ka tnad Pulit Ri Bhoi halor ki jingshim khia ban pynlong ïa ki paidbah kiba shngain ha ka leit ka wan lyngba ka surokbah national Highway ha Ri Bhoi.
Na ka liang ki samla pule ka Mahatma Gandhi University, Byrnihat bad kiba dei na ka law department mynta ka sngi ym tang ba ki la ioh kata ka jingai jinghikai shaphang ki kyndon bapher bapher ka Motero Vehicles Act bad ruh ki kyndon jong ka Traffic Rule bad ki la ioh lad ruh ban shim bynta lang ha kaba pynïaid ïa ki kali paidbah ba la synran lang da ki pulit ophisar ka Ri Bhoi.
Ïa kane ka prokram ai jinghikai la pynlong ha sor Nongpoh ha kaba la shim bynta shit rhem ki samla pule, ki nonghikai bad ryngkat ki pulit ophisar kiba la ai ka jinghikai ha surok kumno ban pynïaid ïa ki Kali paidbah khnang ban shngain ki paidbah ha ka leit ka wan bad ban nym jia kino kino ki jingjia ba sngewsih lada ki kali ki bud ryntih ïa ki kyndon ka traffic rules.
Ïa kane ka prorkam ai jinghkai (Theory and Practical) la lam khmat da u Office Incharge ka Traffic Branch u Rubul Ali ha ryngkat ka jingdon lang kiwei kiwei ki ophisar bad ki pulit na Nongpoh traffic Branch.
Ki samla pule ka Mahatma Gandhi University ha kane ka sngi ki la pynpaw ïa ka jingkmen ban ioh ban shim byna ha kaba pynïaid ïa ki Kali paidbah kum kata ka lad ai jinghikai bad ruh ban tip ïa shibun ki kyndon aiñ kiba tehlakam lada pynkhein ïa ki kyndon aiñ niah Kali.
Ha kajuh ka por ki la ai khublei ïa u SSP ka Ri Bhoi u VS Rathore lem bad baroh ki pulit ophisar, amar dei lyngba ka jingshim khia jongki, ba ki jingjia ba sngewsih ki la duna ha ka surokbah bad ruh kiwei kiwei ki kam sniew kiba ktah ïa ki paidbah namar naduh ba ki Pulit ki la shim khia ban pyni da ka kam ka la long shisha ka jingkyrkhu ïa ki paidbah ba leit ba wan bad bun ruh ki la hap ban bud ïa ki kyndon aiñ niah Kali.
