Shillong, Naiwieng 18 : Ka jingïakhun hapdeng ka Meghalaya bad ka Manipur, ha ka lympung ïalehkai jong ka Ranji Trophy 2025-26 i pynban ba kan poi sha ka jingïakhaid ha kaba ka result kaba lah ban mih na kane ka jingïakhun kan shong sa tang ka jinglah ban ïalehkai bha ki rangïalehkai ha ka sngi kaba kut artad jong kane ka jingïakhun mynta ka sngi Balang.
Haba wan ban sdang ïa ka pali na ka 180/4 wiket, ka Manipur, ka la hap biang noh baroh ki wiket jong ka hadien ba ka la lah ba kan kamai 342 ron. Kane kadei hadien ba ka Meghalaya ha ka pali wan tied ba nyngkong ka la lah ba kan kamai 430 ron bad kaba pynlong ïa ka ban ïoh tam da 88 ron.
Ha kaba kut noh artad jong ka sngi kaba lai, ka Meghalaya ka la lah ba kan kamai 49 ron hadien ba ka la hap noh 1 wiket, bad ïai bteng ban tam biang da kumba 137 ron.
Ha ka jingshisha, na ka liang ka Manipur, ka la pyrshang ba kan lah ban jam beit sha ka thong , hadien ba u AL Bashid bad u Priyojit ki la lah lypa ban ïa kamai mar 52 bad 49 ron, hynrei ha ka sngi kaba bud, kine baroh arngut kim shim la lah ban ban kamai ïa ki ron kiba heh jong ki, hadien ba u Bashid u la khyllem noh ha ka bol jong u Kishan Lyngdoh ha ka por ba u dang kamai 64 ron. Katba u Priyojit u la khyllem noh ha ka bol jong u Chengkam Sangma hadien ba u la lah ban kamai 71 ron.
Hadien kane, u Jotin Pheiroijam u la lah ban kynjoh sha ka thong ka palat shiteng spah ron kata haduh 86 ron ha shwa ba un khyllem ha ka bol jong u Akash. Ha kaba kut u Chengkam, u la ïoh ban khur 2 wiket na ka bynta 50 ron na ki 8 over, u Akash 2 wiket na ka bynta 68 ron bad Aryan Borah 2 wiket naka bynta 83 ron.
Hadien kane, ka Meghalaya ka la ïoh por tang kumba shi kynta ban wan ban sdang ïa ka pali wan tied kaba ar, kaba hangne ka la duh ïa ka wiket jong u Arien Bonchang Sangma ba u la lah ban kamai 7 ron, hynrei na ka liang Arpit Bhatewara (16 not out) bad Duhan (25 not out), ka pynlong ïa ka Meghalaya ba kan jam lyngba ïa ki kynta ba khatduh jong ka jingïakhun.
