SHILLONG, Naiwieng 16: Ka Meghalaya Sport Climbing and Mountaineering Association (MeSCMA) ka sngewsarong ban pynbna ba u General Secretary jong ka synjuk, u Bah Wallambok Lyngdoh u la shah jied kum u dkhot jong ka Governing Council (GC) jong ka Indian Mountaineering Foundation (IMF). Kane ka jingshah jied kadei ha ka jingïalang ba kyrpang jong ka IMF lane ka ‘61st Annual General Body Meeting’ kaba la long ha ka 14 tarik Naiwieng, 2025, ha IMF Campus, New Delhi.
Ka IMF ka dei ka kynhun ba ha khlieh duh kaba don ka jingkitkhlieh ban pynbeit bad peit ha kaba ïadei bad ki kam kiew lum (mountaineering) bad ki Adventure Sports ha ka ri. Ka treikam kum ka bor pynïaid hapoh ka tnad ïalehkai na ka bynta ka ‘Sport Climbing’ ha ki lympung kyrdan jong ka ri bad shabar (National & International level), kynthup ïa ki lympung kiba pawnam kum ka Asian Games bad ka Olympics. Ka IMF ka don ruh ïa ka jingïadei bad ka International Federation of Sport Climbing (IFSC).
Ka Governing Council ka kynthup ïa ki dkhot ba la jied kiba dang shakri ïa ka kam, kiba ïalam, thaw bad pyntreikam ïa ki polisi na ka bynta ban kyntiew bad pynroi ïa ka kam kiew lum bad ki jingïalehkai Adventure sports—kynthup ïa ka Sport Climbing—ha kylleng ka ri.
Ki la don 16 ngut ki nongkieng lum kiba pawnam na ki synjuk ba treikam ba la long dkhot jong ka IMF kiba la ïakhun na ka bynta kane ka kyrdan, ha kaba 11 ngut na kine la jied lyngba ka jingthep vote. Ki dkhot jong ka GC kiba la shah jied kin shakri ar snem ïa ka kam, ha ryngkat u President ba dang shu jied thymmai, u Col. Vijay Singh, VSM (ba la shongthait).
Ka MeSCMA ka khmihlynti ban ïoh jingmyntoi shibun na ka jingmihkhmat jong u Bah Wallambok Lyngdoh ha ka IMF. Ka jingdon jong u ha ka synjuk ba hakhlieh duh (apex national body) kan ïarap ban kyntiew ïa ka kam kiew lum (mountaineering & sport climbing) ha baroh ar ki kyrdan jong ka Jylla bad ka Ri (State & National levels). La khmih lynti ruh ba kane kan pynkhlaiñ ïa ka jingshai bad ka jingmihkhmat jong ka thaiñ shatei lammihngi ha ki Adventure Sports jong ka ri ha ki por ban wan.
Ki dkhot ba la shah jied ha ka GC na ka bynta ka samoi treikam 2025–2027 ki long:
1. Mr. Prem Singh (IG, ITBP ba la shongthait)
2. Mr. Debraj Dutta (Kolkata)
3. Mr. Wallambok Lyngdoh (Meghalaya)
4. Col. Anand Swaroop (ba la shongthait)
5. Mr. Harbhajan Singh (IG, ITBP ba la shongthait)
6. Mr. M.R. Vijayraghavan (Karnataka)
7. Ms. K. Saraswati (Maharashtra)
8. Mr. Yambem Laba (Manipur)
9. Mr. Debabrata Mukherjee (Kolkata)
10. Mr. Keerthi Pais (Karnataka)
11. Group Captain R.C. Tripathi, VM (G) (ba la shongthait)
