Nongpoh, Naiwieng 15: “Lada ngi sngap ïa ki jingkynthoh ha ki rynsan Social Media, ngi la blad ka mynsiem bad ngin nym lah shuh ban trei ïa kino kino ki kam kiba bha ha ka imlang ka sahlang” ong u Bah Sosthenes Sohtun, MLA ka Jirang bad u Myntri ba peit ïa ka Tnad C&RD ka sorkar jylla haba kren ban ai mynsiem ïa ki nongïalam ka Ri Bhoi Youth Federation (RBYF) bad sha ki samla pule kiba pas bha ha ka SSLC bad HSSLC ba la pykup burp da ka RBYF hynnin ka sngi ha Saiden.
Kum uwei u na u nongïalam ka RBYF uba la poi sha ka kyrdan myntri sorkar, u Bah Sosthenes Sohtun u la kyntu jur ïa ki nongïalam ka RBYF bad kynthup ruh ïa ki samla pule ka Ri Bhoi, ba kim dei ban sngap ïa ki jingkynthoh ha ki rynsan social media, namar lada ki sngap ïa kita ki jingkynthoh ba bun jaid ki la kut lynti noh ïa lade ban poi sha kataka thong kaba ki angnud ha ka jingim.
U la ong ruh ha kane ka juk social media kiba bun hi ki dei tang ki jingkynthoh suda (Negative Comments) la ngi leh ïa kiba bha ne kiba sniew, namar kane ha kano kano ka imlang ka sahlang bunsien ki buh shwa hakhmat ïaka jingkynthoh kaba ngim dei ban sngap ïa ki.
“Nga ïa lade, ngam ju peit ïa kino kino ki jingkynthoh ha ki rynsan social media, namar lada peit ïa ki jingkynthoh la blad lypa ka mynsiem bad ngin nym lah shuh ban trei ïa kaei kaba ngi thmu ban trei na ka bynta ka imlang ka sahlang” ong u Bah Sosthenes Sohtun, bad bynrap ruh ba kum ki nongïalam ha ka District ruh kim de ban sngap ïa ki jingkyntoh bad ki dei ban bteng beit ka jingshakri na ka bynta ban kyntiew ïa ka malang ka sahlang” u la bynrap.
Ha kawei ka bynta, u la kyntu ruh wat ïa ki samla pule ba kim dei ban sngap ïa kino kino ki jngkynthoh bad kum ki samla ki de ban trei shitom bad ban pule bha ïa ki jingpule, khnang ba lyngba ka kyrdan jingstad jongki, kin lah ban poi sha ka thong jong ka jingim.
Shuh shuh, ha kane ka sngi, u la pynpaw ruh da kaba ong to ngin nym ïa sngap ïa kino kino ki jingkyntoh la ki dei ki nongïalam seng, ki nongmihkhmat ne ki samla pule bad tang kawei kaba donkam ka long ban don kata ka mynseim jong ka jingïatrei lang na ka bynta ban kyntiew ïa ka dong ka thain, ka District bad wat ïa ka jylla hi baroh kawei, u la bynrap.
