Nongpoh, Naiwieng, 13: Ki pulit ka Ri-Bhoi ha ka jingïalam u VS Rathore Senior Superintendent of Police, bah Orville Massa Additional SP ryngkat ki pulit ophisar ha ka jingtalasi hynnin ka miet ha Umling bad ki seng samla kila bat ïa kawei ka kali kaba pynmeh light VIP ha ka por ba dang talasi.
Ha ka jingtohkit u SSP la lap ba katei ka kali kaba don ïa u Number AS 02 AM 6786 ka dei jong u Rakibul Hussain u ba dei u MP jong ka Dhubri Lok Sabha Constituency, hynrei u nongñiah u la pynmeh ïa ka light VIP khlem da don u tei u MP hynrei tang u khun u ba shong hapoh katei ka kali kaba long kum ka jingpyndonkam bakla ïa katei ka light VIP.
Na ka liang u SSP u la phah weng mardor ïa katei ka light bad daiñ kuna namar kino kino kim lah ban pyndonkam bakla ïa ka bor bad ka kali khlem da don u VIP u ba dei ban don lang hapoh.
