Jowai, Naitung 04 : Ïa ka ‘Open District Chess Competition’ kaba ar sngi lynter la pynkut noh hynnin ka sngi saitjaiñ ha Thomas Jones Synod College Jowai shi bynta na ka jingrakhe ïa ka Jubilee Rupa jong ka jingdap 25 snem ka College.
Ïa kane ka jingïalehkai Chess la pynlong ha ryngkat ka jingïatreilang bad ka Jaiñtia Hills District Chess Association, ha kaba la wan ban ïashim da ki khynnah skul bad ki riew shimet na ki ar tylli ki District kata ka West bad East Jaiñtia Hills kiba la don baroh haduh 30 ngut kynthup ïa kawei ka samla pule.
Ïa kane ka jingïakop ïalehkai Chess la wan ban pynhap pyrda da u kongsan uba dei u Superintendent of Police West Jaiñtia Hills, u Bikram D Marak ha ryngkat ka jingdonlang u Assistant Professor M.J Lamare, Assistant Professor D.M Shanpru, President JHDCA ma Paia Lhuid, Adviser JHDCA ma P Lyngdoh lem bad ki member na Meghalaya Chess Association nalor kiwei de.
Na ka liang u kongsan u Bikram D Marak haba ai jingkren ula ai ka jingïaroh ïa ki nongpynïaid ïa kane jingïalehkai Chess khamtam eh ïa ki nongwan ïashim bynta, ula pynpaw ka jingsngewkmen ban ïohi ba la don kawei ka samla kynthei kaba la wan ban ïashim bynta ha kane ka jingïakop, da kaba ula kyntu ba kan dang ïaid bteng ïa kane ka ka jingïalehkai kum kawei na ki khlur ïalehkai Chess kaba lah ruh ban ai mynsiew ïa kiwei.
Ha ka juh ka por u kyntu ïa baroh ki nongïalehkai ba kim dei ban kut tang hangne hynrei ki dei ban mih shakhmat ban leit ïashim bynta ha ki jingïalehkai Chess bapher bapher, da kaba ula pynsngew ba ka jingïaleh Chess naduh ba sdang ïa ka kum ki nongïalehkai ki dei ban don ïa ka thong.
Ha ka jingïakhun la pynbynta ïa ki nongïalehkai ha ki lai kyrdan kata ka ‘Open Category, Junior Category bad ka Girl category’, ïa kaba la ai por haduh 15 minit na ka bynta 7 round. Ïa ki khusnam sha ki nongjop la dam da u kongsan ha ka kyrdan ‘Junior’ la wan ba nyngkong da u Pynwanroi Suting, ba ar u Daekyrpangmitre Pyrngap bad balai u Leon Raymond Rymbai.
Ha ka kyrdan ki kynthei ‘Girls Category’, la jop da ka Sowkidaboi Papang, katba ha ka ‘Open Category’ ba wan nyngkong da u Richard L Jongte, ba ar da u Paiada Ohi Lhuid bad ba lai da u Huron Y Buam.
