Nongpoh, Naiwieng 12: Hadien katto katne sngi bala pynkut noh ïaka Block Level, Chief Minister, Meghalaya Youth Engagement Programme 2025, ka ophis u District Sports Officer Ri-Bhoi District ryngkat ka jingïatreilang bad ka ophis u Deputy Commissioner, Ri-Bhoi District mynta ka sngi kila sdang pat ïakatei ka juh ka rynsan sa haka District Level kaba la la tip kum ka 4th District Level, Chief Minister, Meghalaya Youth Engagement Programme 2025 kaba la pynlong ha Parish Hall Nongpoh ban lum ban lang ïaki khun samla ka district naki Block bapher bapher ha katei ka prokram kyrpang ban sei ïaka sap ka phong ki khun samla.
Ïa kane ka prokram la wan ban plie paidbah mynta ka sngi da u Bah Mayral Born Syiem MLA ka Nongpoh kum u kongsan haka jingdonlang u Abhilash Baranwal Deputy Commissioner ka Ri-Bhoi District, u Bah Boby Nongbet DSO, u Bah Orville Massar Additional SP ka Ri-Bhoi, ki ophisar naka tnad pule puthi, bad kiwei kiwei.
Lah ruh ban kdew hangne ba kane ka rynsan ka long ka lad ïaki khun samla ka district ba kin pynpaw pyrthei ïaka sap bapher bapher ba ki don haka jingim jong ki naduh ka rwai ka siaw, ka put ka tem bad ki jingïakop bapher bapher bad lyngba kane ka rynsan kan btin lynti ïaki samla ban jam na uwei u mawjam sha uwei pat ban poi sha ka State Level, National Level bad wat sha ka International Level.
U Bah Mayral Born Syiem haba kren ha kane ka sngi u la pynpaw ka jingsngewkmen ba naduh ka Block Level la iohi ba ki khun samla ki don shisha ka sap bad ka jingtbit haki liang bapher bapher bad kane ka pyni ba ki samla na kane ka them Ri-Bhoi kim dei shuh kiba dang duna hynrei ki dei kiba don pahuh ka sap kaba u Blei u la ai haki bad donkam satang ban phrang bad ban pynjanai ïaki.
Kum u nongmihkhmat paidbah ha katei ka sngi u la kular ruh ban ai da ka khusnam pisa sha ki lahduh ne overall champion haka liang ki kynthei bad shynrang hadien bala kut kane ka prokram ba 3 sngi lynter kum ka jingai mynsiem ïaki bad ïa kiwei kumjuh ba kin don ka thong ban leh bha haka jingim bad ban treishitom ban pyndonkam hok ïaka sap kaba ki don.
