Nongpoh, Naiwieng 12: Ka District Disaster Management Authority (DDMA), Ri Bhoi District, Nongpoh, mynta ka sngi kala sdang ban ai jinghikai sa ïaka kynhun ba ar (2nd Batch) jong ka prokram hikai ba 7 sngi lynter naka bynta ki samla hapoh ka Yuva Aapda Mitra Scheme (YAMS).
Kane ka jinghikai kan sdang naduh mynta ka sngi bad kut haduh ka 19 tarik Naiwieng ha Ri-Bhoi College Nongpoh, bala wan ruh ban shim bynta da ki samla kiba long ruh ki dkhot jong ka National Service Scheme bad kitei ki samla kin ioh ruh ka jinghikai naki briew kiba la pyntbit ïalade kumno ban pynkhreh bad ïarap haka por ba don ka jinglynshop mariang.
Ïa kane ka prokram la wan ban plie da ka kong B Ranee ADC ka Ri-Bhoi kum ka kongsan, haka jingdonlang u Bah BK Swer Deputy Controller of Civil Defence, Bah J Mawthoh DDMO-cum-Nodal Officer YAMS ryngkat ka kynhun jong ka NSS.
Haba kren ha kane ka sngi naka liang ka kong B Ranee kala ong ba kine ki samla ki ban sa ioh ka jinghikai kin sa long kum ki nongïarap ba nyngkong haka por ba don kano kano ka jinglynshop mariang namar ban hikai ïaki samla kiba dang pule bad kiba dang biang ka bor pyrkhat bad ka met ka phad kan ïarap shibun ïaka imlang ka sahlang haka por ba don kino kino ki jingjia namar kum ka jylla ka hap long kaba pynkhreh lypa.
