Ka Jakrem kum ka lahduh ba nyngkong eh ha ka Meghalaya Women’s State League

Shillong, Naiwieng 12: Ka Jakrem SC ka la wanphai nadien ban jop da 2-1 kol ha ka jingïakhun phainal kaba itynnad jong ka Meghalaya Women’s State League 2025 pyrshah ïa ka Na Rympei Football Academy, ha madan First Ground-SSA Stadium, Polo, ha ka janmiet jong ka sngi Balang.
Ha kane ka jingïaknieh nam lahduh jong ka lympung ïalehkai phutbol ki kynthei kaba nyngkong eh ha ka jylla baroh kawei ha Meghalaya, ka Na Rympei, kaba mihkhmat ïa ka Ri-Bhoi District Sports Association, ka la ïoh ban lam khmat ha ka minit kaba 14 lyngba ka snar thep kol ba kynsai jong ki ka Pynhun Shulet. Pynban ka kol kaba la kum thep hi kaba shu jia ryngkhat ha ka minit kaba 58 ka la pynlong ïa ka Jakrem ban ïoh pynïakhaid shuwa ba ka Iaphisha Marbaniang (72’) kan pynkhih ïa ka kol na ka bynta ka jingjop.
Kumta, da kane ka jingjop, ka Jakrem, jong ka Mawkyrwat District Sports Association, ka la pynsah ïalade ha ka histori kum ka lahduh ba nyngkong eh jong ka MWSL, ka sienjam ba la pynlong da ka Meghalaya Football Association ryngkat ka jingkyrshan jong ka tnad ïalehkai ka Sorkar Jylla ban kyntiew ïa ka kyrdan ïalehkai phutbol jong ki kynthei ha ka jylla.
Ha kane ka jingïakhun phainal la ïadon lang u Principal Secretary u Frederick Roy Kharkongor IAS kum u Kongsan, u Assistant Director jong ka tnad ïalehkai – Bah Paia B War Nongbri kum u symbud kongsan, u President ka MFA – Bah Hamletson Dohling, u General Secretary ka MFA – Bah Sunesh Syiem, ki nongkitkam bad ki dkhot ba rangbah jong ki synjuk ba ladep ïasoh bad ka MFA, bad da ki hajar ngut ki nongkyrshan kiba la pynshngaiñ ïa ka jinglong jingman ha madan. Baroh ar tylli ki kynhun ki la ïoh ïa ka jingkyrshan naki paidbah, watla ka Jakrem ka la ïoh ïa ka jingjop.
Ka MWSL, ka la sdang naduh ka 20 tarik Nailur ha kaba la plie paidbah da u Myntri ka tnad ïalehkai u Bah Wailadmiki Shylla. Ha ki 34 tylli ki jingïalehkai kiba la pynlong ha ki san tylli ki jaka ki paid nongkyrshan ki la ïoh ban sakhi ïa ki thei-ïalehkai phutbol kiba tbit tam jong ka Meghalaya kiba ka jingieit jong ki ïa ka phutbol ka long kaba ym lah ban ïanujor. Ka jingïakhun phainal kaba long hapdeng ar tylli ki kynhun kiba nabar ka nongbah Shillong ka pyni ba ka don ka lad kaba khraw na ka bynta ka jingkiew jong ka phutbol ha baroh ki dong jong ka Meghalaya.
Ha ba phai sha ka phainal, ka Pynhun ka la ïohlad ban pynkhihjar ha ka minit ba 14 hynrei ki nongïalehkai ba shadien jong ka Jakrem ki la pynjur ban pahara ïa ka ha baroh kawei ka jingïalehkai.
Katba na ka liang jong ka Jakrem, kaba la shah lamkhmat ha ka semifinal pyrshah ïa ka Laitkor SC shuwa ban jop ïa ka jingïakhun da 2-1, kam shym la duh mynsiem satia wat hadien ba shah thep. Pynban ki la pynjur ban tur shakhmat, kaba la buh ïa ka Na Rympei ha ka jingma kaba khraw. Ka la shim por kumba shi kynta ïa ka Jakrem shuwa ba kin ïoh ban pynïakhaid, watla ka kol kadei kaba la thep hi (own goal) da ka nongïalehkai ba shadien jong ka Na Rympei ha ka jingpyrshang ban pynkiar ïa ka bol sharud na ka jingma.
Khatduh khatwai dei ka Iaphisha kaba la thep ïa ka namtam ban pynjop ïa ka Jakrem, ha kaba ka la khur syndon ïa ka nam Player of the Final.
Kiwei pat ki khusnam shimet ki kynthup ïa ka Sunalinda Iawren jong ka Jakrem, kaba la ïoh ïa ka nam Player of the Tournament, ïa ka Golden Glove na bynta ka nongap kol ba kynsai la khur da ka Ionaris Khongsit jong ka Mawlum Tyrsad SC, hadien ba ka la pyndep 4 tylli ki jingïalehkai khlem da shah thep (clean sheet) ha kane ka lympung, katba ka Golden Boot na bynta ka nongïalehkai ba bun kol tam la khur da ka Iaraplang Nongrum jong ka Laitkor, kaba la thep 21 kol.
Kum ka kynhun kaba wan ba-ar (runners-up), ka Na Rympei ka la ïoh khur ïa ka khusnam pisa kaba T.1 lak, katba ka Jakrem kum ka lahduh ka la ïoh ïa ka khusnam pisa kaba T.2 lak.