Nongpoh, Naiwieng 06: U Deputy Director, District Youth Officer, i/c Mera Yuva Bharat, Ri-Bhoi district u la pyntip ba yn pynlong ïaka Sardar @ 150 Unity March (Rallies) ha Ri-Bhoi district haka 10 tarik Naiwieng naduh ka por 11 baje mynstep ka ban sdang na Indoor Stadium Umlyngkdait sha Ri-Bhoi College.
Ha kane ka sngi 2 ngut ki MLA ba kynthup ïa u Bah AL Hek bad u Bah Mayral Born Syiem kin shim bynta ban kaweh lama ha katei ka jingïaid rally bad la kyrpad ruh ïaki khun samla haka district ban shim bynta shitrhem ha kane ka prokram.
Kane ka dei ka jingïalap kaba la pynlait paidbah haka 6 tarik Risaw da u Union Minister ka tnad Youth Affairs & Sports u Dr. Mansukh Mandaviya kum ka jingrakhe ïaka jingdap 150 snem ka jsngi kha u Sardar Vallabhbhai Patel u ba la tip ruh kum u iron man ka ri India ha baroh ki district jong ka ri.
Ka thong jong kane ka prokram ka long ban wanrah ka mynsiem jong ka jingïatylli, ka jingieid ri bad ka jingkitkhlieh kum ki nongshong shnong hapdeng ki samla jong ka ri India bad ha kane ka jingïalap kin don ruh ki prokram bapher bapher ki jingïakop naduh ka ïakop thoh essay, social media reel, ki jingkyntip ktien lyngba ka digital platform ha www.mybharat.gov.in bad ki nongjop kin ioh ban shim bynta haka National Level.
