Nongpoh, Naiwieng, 04: Namar ka jingkyrduh kam bad ka jingwad kam jong kiba bun ki samla trai muluk kiba la biang ïa ki kyrdan pule bapher bapher, ki nongïalam ka Federation of Khasi Jaiñtia and Garo People, Baridua Circle, mynta ka sngi ka la leit ban buh syndon da ka jingthoh sha 2 tylli ki jaka sumar ba paw ba kynthup ïa ka ARHI Hospital kaba don ha Mawsmai bad ka PA Sangma International Medical College and Hospital (PIMC) kaba don ha 9 mer Baridua bad ïoh ruh ban ïakynduh bad ïakren bad ki bor pynïaid kitei ki ar tylli ki jaka sumar ba kynthup ïa u Bah Aibor Nongsiej Director ka ARHI Hospital bad u Abhinandan Das Principal ka PIMC ba kin shimkhia kyrpang ïa kane ka kam.
Haba kren sha ki lad pathai khubor naka liang u Samla Alan Donald Sohpdang hadien ka jingïakynduh bad ki bor pynïaid jong kitei ki 2 tylli ki Hospital u la ong ba hadien ka jingmih kitei ki 2 tylli ki jaka sumar ba dang thymmai, ka long ka jingmyntoi ïa ka jylla hynreikum ka seng ka kwah ba kum ki khun samla na kane ka jylla kin ïoh ban rung khlieh ha kitei ki jaka sumarkiba la pyndep ïa ki klass bad ki kyrdan bapher bapher kiba la tbit ruh ban trei ha bun ki kam ha kitei ki jaka sumar.
Kum kum ka seng naka bynta ka jingïohkam ïohjam ki samla na khasi na kane ka jylla ki la leit ban ïakynduh bad ki bor pynïaid ba ki dei ban phai khmat shuwa sha ki samla trai muluk ha kaba ïadei bad ka ïohkam ïohjam ha ki kam katkum ki kyrdan jong ki namar bun hi ki samla ki shu shongiing khlem kam khlem jam hadien ba ki la dep ïa ki jingpule bapher bapher.
U la ong ruh ba naka liang ka seng ka pynpaw ka jingsngewhun ban ïoh sngew naki bor pynïaid katei ka hospital kiba la ai ka jingkular sha ki nongïalam ka seng ban ailad shuwa ïa ki samla trai muluk na kane ka jylla ha kaba ïadei bad ka thungkam thungjam ha ki post bapher bapher.
