Mawkyrwat, Naitung 03: Ka ophis u District Sports Officer (DSO) jong ka South West Khasi Hills District ha ka 2 tarik u Naitung, 2022 ka la ïoh ban sdang biang ïa ki shlem ai jinghikai (Grass Root Centre) ba ïa dei bad ka jingïalehkai kynjatbol na ka bynta ki hep rit kiba naduh 6 haduh 11 snem karta kiba hapoh jong ka South West Khasi Hills District.
Lah ba kdew ba ki shlem ai jinghikai ha ka kam ïalehkai kynjatbol ki don baroh 7 tylli ki Grass Root Centre ki long kawei ha Mawkyrwat, ha Ranikor, ha Nongnah, ha Nongjri, ha Mariem bad ïa ki ar tylli kata ha Mawthong bad ha Photjaud ha ba kin ynsa plie ha kine ki sngi. Ha kine ki shlem ai jinghikai na ka liang ka ophis ka la buh haduh 60 ngut ki khynnah rit ba kin don ha kawei kawei ka center bad kine baroh ki center mynta ka sngi hi ki la ïoh ban sdang ïa ki jingai jinghikai na ka bynta ki khynnah rit kiba la wan ïashimbynta.
Halor kane ka jingplie biang ïa kine ki shlem ai jinghikai ha ka jingïalehkai kynjatbol ka long hadien ar snem ba la pynsangeh shipor na ka daw jong ka jingdon ka khlam corona virus bad da ka jingailad bad duna ka jingdon jong kane ka khlam na ka liang ka ophis jong u District Sports Officer, South West Khasi Hills District ha ryngkat ka jingïatreilang bad ki skul, ki kmie ki kpa lem bad ki sports club ki la ïoh biang ka lad ban plie pyrda lyngba ka jingwanlam jong ki ïa ki khun ki kti sha kine ki shlem ai jinghikai.
Ha ka jingïalang ba lyngkot ba la pynlong ha madan jong ka shnong Thangrai (Nongnah), South West Khasi Hills District, u Bah Damang Syngkon, District Sports Officer, South West Khasi Hills District u la pynpaw ka jingaikhublei kaba kyrpang na ka bynta ki hep kiba rit kiba la ïaleh shitom ban poi ha kane ka madan ha ryngkat ki juti ïalehkai ba ki la long kiba la khreh ban shah hikai.
U la ong ruh ba kum kine ka jaka ban ai jinghikai ïa ki hep kiba rit ha kaba ïadei bad ka jingkynjatbol hapoh ka dong ka thaiñ ka long kaba donkam bha namar ba ban hikai ïa kino kino ki jait jingïalehkai ka donkam eh naduh ba ki dang rit khnang ba kin lah ban pyndonkam hok ïa ka sap kaba ki ki don bad ruh ba kin lah ban poi sha ka thong jong ka jingjop.
Shuh shuh ula ong ruh ba ki rukom hikai na ka bynta ki hep kiba rit kan long ar sngi ha ka shi taïew kata ha ka janmiet sngi Thohdieng bad kumjuh ruh ha ka step sngi saitjaiñ. “Na ka bynta ka jinghikai ïa kine ki hep kiba rit kum ka ophis ka la dep ban thung ïa ki nonghikai (Community Coaches) ki ban peit bad ban hikai ïa ki”, ong u Bah Syngkon.
Ïa ka jingïalang la pynïaid da u Bah Micheal Lyngdoh, ka jingkren lyngkot na u Bah Rufferson Parïong, President Thangrai Sports Club bad na u Bah K.R. Lyngkhoi, General Secretary ka Ranikor Civil Sub-Division Sports Association cum Rangbah Shnong Mawendeng.
