Shillong, Naitung 03 : Ka Malki SC bad ka Rangdajied FC ki la hap ban ïasam mar shi point hadien ka jingïalehkai ka la ïakhaid noh khlem da don ba lah ban ïathep kol ha ka lympung ïalehkai OC Blue Shillong Premier League 2021-22 kaba la long ha ka sngi Saitjaiñ ha madan Third Ground, Polo.
Kane kadei ruh ka sien kaba nyngkong jong ka samoi ïalehkai SPPL 2021-22 ba ka jingïalehkai kan kut khlem da don ba lah ban ïathep kol. Ha kane ka jingïakhun ka Malki ha ka minit ba 40 ka la hap ban ïalehkai tang shiphew ngut hadien ba u March Marbaniang u la shah beh noh na madan, bad kadei ka sien ba ar ïa ka Malki ban ïoh red card ha ki laisien ïakhun.
Watla ka Malki ka la hap ban ïalehkai tang shiphew ngut hynrei ka Rangdajied ka la duh bun ki kabu thep kol ha kaba ka la hap ban neh biang ha ka kyrdan ba lai na ka miej kheiñ point da kaba khur 5 point na ki laisien ïalehkai, bad don hadien ka Ryntih SC kaba khur 6 point bad ka Mawlai SC kaba lamkhmat nyngkong da 0 point.
Katba ka Malki ka don ha ka kyrdan ba san da 4 point bad ïaryngkat bad ka Langsning FC hynrei ïapher ha ka jingïathep kol.
Ha kane ka sngi u Aiborlang Khongjee u la pynkylla ha ka rukom pynmih madan na bynta ka kynhun ba 1 ngut, da kaba ailad ïa kiwei pat ki player kiba shongben ha ki jingïalehkai ba lah dep, kum u Denzil Warjri, Balamlynti Khongjee, Oresterwell Langshiang bad ïa u Khrawkupar Jana.
Katba u coach ka Malki u Bah Kitkupar Kharshiing, u la pynkylla tang arngut da kaba pymih madan ïa u Nikel Ryntathiang bad Emboklang Nongkhlaw, uba dei ruh u player dang khie uba don bad ka Bengaluru FC ha kine ki khyndiat snem.
Ka jingïalehkai ka la sdang da ka jingïatur ba mar kylliang sha ki kut hynrei ym shym la don ba lah ban thep kol. Ki rangïalehkai dien ka Malki ki khlem da lah bha ban kyrda bol hynrei ki rangïalehkai ka Rangdajied ki khlem lah pat ban thep kol.
Watla baroh ar ki khlem lah ban pyndep thep kol, u Donboklang Lyngdoh ha ka jingïalehkai ba dang ïaid lai minit u la pynlehnoh ei ïa kawei ka kabu na bynta ka RUFC. U Kyrpadlang Tariang ruh u la ïoh ka kabu ban thep kol na bynta ka Malki ha ka minit ba 38 hadien ba u la ïoh ka bol na u Emboklang hynrei u khlem lah pat ban pynrung ïa ka bol.
Ha ka jingïalehkai jong ka kylla miet, u Marbaniang u la ïoh pdiang ïa ka red card hadien ba u la ïania bad u referee ha kaba ka Malki ka la kham tlot ha ka rukom ïalehkai, hynrei watla kata ruh ka Rangdajied ka khlem lah ban pynurlong ïa ki kabu kiba bun ba ka la ïoh.
Ka Malki ha ka minit ba 88 ka Malki ka la ïoh ka kabu lyngba u Kenny Kharnaior uba la pyndei da ka khlieh ïa ka bol kaba la tam noh ïa u diengkol.
Kumta ka jingïalehkai ha baroh ki 90 minit ka la kut khlem da lah ban ïathep kol kaba la pynlong ïa kine ki ar tylli ki kynhun ban ïasam mar shi point. Kadei ruh ka sien ba ar ba ka Rangdajied United FC kan mad ka jingïakhaid hadien ba ka la ïakhaid da kaba ïathep mar shi kol bad ka Mawkhar SC ha ka jingïalehkai kaba nyngkong.
Ka jingïalehkai Shillong Premier League kan long pat ha ka sngi ba ar hapdeng ka Nangkiew Irat SC pyrshah ïa ka Mawkhar ha ka por 4 baje janmiet.
