Jowai, Risaw 29: U Superintendent of Police (SP) ka West Jaiñtia Hills District ula pyntip ba ka don kawei ka met ïap jong ka longkmie kaba la buh sah ha Jowai Civil Hospital, Ialong, ha kaba ula kyntu ïa kiba haïing hasem ne kiba don jingïadei ba kin wan shimti noh ïa katei ka met ïap hapoh ka 48 kynta.
Katkum ka khubor Pulit ba la phah mynta ka sngi, la iathuh ba katei ka longkmie ka dei kaba la tip kyrteng kum ka Ruksana Begum kaba don kumba 45 snem ei ei ka rta bad kaba shong ba sah ha shnong Dawki. Ïa kane ka longkmie la wan ban kit sha Dr. Norman Tunnel Hospital, Jowai ha ka 13.10.2025 da u lok jong ka hi u Nur Khan.
La ïathuh ba kane ka long kmie kala mynsaw na ka jingur ha kamra sum bad kala mynsaw na ki bynta jong ka shalyngmat bad ka jingheh jong ka jingmong ka long 6 inshi. Kane ka longkmie kala khlad noh na ka daw jong ka jingjur ka jingphlie snam la ïathuh ki Dortor hadien ka jingtohkit.
Ïa ka kes la shimti da ka Jowai Women Police Station, West Jaiñtia Hills District ha ka 14.10.2025 bad la leit rah ïa ka sha ka ïingshari. Na ka liang ka ïingshari ka la shong bishar ïa kane ka kes ha ka 22.10.2025.
Kumta na ka liang ki Pulit lyngba u SP ka West Jaiñtia ula pynmih ïa kane ka hukum ïa kino kino kiba don jingïadei bad kiba haïing hasem jong ka Ruksana Begum ba kin wan shimti ïa ka met jong ka hapoh 48 kynta naduh ba la pynmih ïa ka hukum, lym kumta ki bor ba dei peit kin sa leh noh ïa kaba donkam katkum ki kyndon jong ka aiñ.
Kiba don jingïadei bad kane ka longkmie ki lah ban phone ha Jowai Women Police Station, lyngba ka phone number: 6909367216 lane 9774065467.
