Ther u rangbah na Ri Bhoi ïa ki 60 ngut ki MLA ba buh sha kyndong ïa ka tnad pule puthi ha ka jylla

Nongpoh, Naitung 02: Khlem da kheiñ ïa ki MLA ba don ha ka sorkar ne ha ki liang pyrshah bad halor ka jinglong jingman hapoh ka tnad pule puthi ha ka jylla, uwei u riew rangbah na Ri Bhoi District da ka jingsngewkhia kaba jur u la mih shakhmat ban ther tyngeh ïa ki 60 ngut ki MLA hapoh ka jylla halor ka jingbym shim khia ïa ka tnad pule puthi hapoh ka jylla.
U Bah Cleophast Thre Nongrum u dei u nongshnong shnong na ka shnong Umdaprangi ha Ri-Bhoi District bad kum uwei u riew rangbah na Ri Bhoi u la mih shakhmat ban kren halor ka jinglong jingman jong ka tnad pule puthi, ka dei ka jingsngewkhia jong u halor ki jingeh bad ki jingshah khñiot beiñ ki Nonghikai hapoh ka jylla ba ka sorkar bad wat ki Nongmihkhmat ki buh sha kyndong ïa ka tnad pule puthi.
Haba ïa kren mynta ka sngi bad ki Nongthoh Khubor ha Ri Bhoi, u Bah Cleophast Thre Nongrum, u la ong ba kum u riew rangbah um banse ban mih shakhmat na ka bynta ban kren ïa ka jingeh ki nonghikai bad ka jinglong jingman ka tnad pule puthi bad baroh kine ki wan jia ka dei namar ba ki 60 ngut ki MLA hapoh ka ïing Dobrar Thaw aiñ ka jylla ki don ka jingiohi jngai kumno ban kyntiew ïa ka pule ka puthi, kaba dei kawei na ‘Karkhana’ ban saiñdur ïa ka jylla hi baroh kawei.
U la kynthoh ruh ym tang ki MLA kiba ym don ha ka bor synshar, hynrei wat kito kiba don ha ka bor synshar ruh ki kheiñ sting ia ka tnad pule puthi ba ki tip ba kane ka tnad pule puthi kam don pisa kumba long ha kiwei kiwei ki tnad (Department) ba bun pisa bad dei namar kane ka daw ka tnad pule puthi ka hiar bad khamtam kaba sngewsih ban iohi ba ki Nonghikai kaba ngi khmih lynti kin ai jingnang jingstad ïa ki khynnah ki hap ban mih madan ban dawa ïa la ka hok kumba la jia hapoh kane ka jylla.
“Haba kren kyllum hapoh ka tnad pule puthi, naduh ki nonghikai Adhoc, SSA, Deficit bad kiwei kiwei ki nonghikai ki la shah khñiot beiñ shisha ha ka sorkar bad kumno ngin khmih lynti ba ki ai ïa kata ka jingnang jingstad kaba paka ïa ki khynnah haba ka bainong kaba ki trei ki shah set da ki bnai bad na ka bynta ban dawa ïa la ka hok kim banse ban ieh ïa ka skul bad ki khynnah bad ban mih sha madan ban dawa ïa ka hok na ka sorkar” ong u Bah Nongrum.
U la ong ruh ba ka long ka jinglehraiñ ia ka jylla ba ki nonghikai kiba ngu ju tip ba ki long kita ki nongtei ïa ka imlang ka sahlang bad kiba ngi ñiew burom ïa ka kam kaba ki trei kum kita ki nonghikai kiba kyntiew ïa ka pule puthi bad ka jingnang jingstad bad khlem da tip shuh ïa ka burom kaba ki don ki la hap ban mih sha madan kum ki ksew, ki sñiang bad ki mrad ban thiah ha ki lynti ki syngkien tang na ka daw ba ki dawa ïa ka la hok ba ka sorkar ka kheiñ dew thala ïa ka kam kaba ki trei ban wan rah jingshai hapoh ka jylla.
U la kren ruh ym tang ba ki nonghikai ki shah leh beiñ ha ka sorkar bad lada phai halor ka jinglong jingman ki skul pule ruh bun ki long kum ki sem masi ne ki sem mrad kim biang ki kamra klas, ki jingdonkam jong ki khynnah bad kumno ngin lah ban ong ba ngin kyntiew ïa ka pule ka puthi haba ka sorkar ka buh sha kyndong ïa ka tnad pule puthi.
U la kren ruh wat ha ka por election ba ki nonghikai kiba hap ban pynleit jingmut ha ka kam hikai skul, ka sorkar khlem da burom bad ka phah ban leit ‘Election Duty’ bad kane ka dei kaba ngim lah ban pdiang bad kum ki noinghikai ki dei ban ioh ïa ka por kaba janai ban ai ïa ka por na ka bynta ki khynnah skul bad ym ha kiwei pat ki kam.
Namarkata, u la ong ba kane ka jingshah khñiot beiñ ki nonghikai bad ka jingbuh ka sorkar ïa ka tnad pule puthi sha kyndong ka la dei ka por ba ym tang ki nonghikai kin mih ban pyrshah, hynrei la dei ban mih ban ïa pyrshah naduh ki khun ki kti bad ki paidbah ka jylla hi baroh kawei khnang ba kum ki nonghikai kin ioh ïa la ka hok bad khamtam ngi donkam ban kyntiew ïa ka pule ka puthi bad lada ym don ki nonghikai kiba ai jingnang jingstad shaei kan poi ka lawei jong ka jylla, u la bynrap.