Balei thad paidbah ïa ka Ophisar ha ka ‘Showcause Notice’ -Thalaiñ ka Liang Pyrshah ïa ka EC ka VPP ha KHADC

Shillong, Risaw 22 : Ka Liang Pyrshah jong ka Ïïng Dorbar Thawaiñ ha KHADC ka la buh jingkylli bad thalaiñ tyngeh ïa ka Executive Committee ba ïalam da ka VPP ha Khasi Hills Autonomous District Council (KHADC) da kaba kynnoh ba ki la pynjah burom ïa ka Ophisar da kaba thad madan ïa ka showcause notice kaba ïadei bad ka ishu Professional Tax.
Haba shim bynta ha ka jingïatai halor ka ‘zero hour notice’ ba la wanrah da u MDC ka Mawshynrut, na ka liang u Nongïalam ka Liang Pyrshah Bah Titos W Chyne u la pynpaw ka jingkyndit bad ka jingsngewkhia ban ïohi halor halor ka rukom ai ïa ka showcause notice sha ka superintendent jong ka professional tax ïa kaba la thad paidbah ruh.U la ong ba ia kane ka notice ym shym la ai ha dien ba la hiar shuki u CEM hynrei la ai naduh shwa namar ka notice ba la dep ai lypa sha uwei na ki trai dukan ka don kopi bad u kata kaba dei naduh shwa ban hiar shuki u CEM.
U Bah Titos u buh jingkylli ruh la katei ka notis ba la pynmih da ka superintendent jong ka professional tax ka dei neem.
U buh jingkylli ruh ba kato sien u Executive Member ka tnad Taxation u donkam ban ai jingmynjur na ka bynta kitei ki notis bad ruh hapoh ka rule aiu ba ïa ka showcause notice la ai pyrshah ïa ka superintendent.
U Bah Titos u la pynpaw ïa ka jingsngewkhia ba ka jingleh jong ka EC ka lah ban pynmih ïa ka rukom treikam da ka jingtieng hapdeng ki ophisar, kaba la pynlong ïa ki ban artatien ban trei.
“Lada kane ka dei ka rukom treikam jong ka EC kaba mynta, hato ngin dang don ne em ka jingshaniah jong ki ophisar? Hato ki ophisar kin trei da ka jingtieng?” u la kylli.
U la maham ruh ba ka jingthad paidbah ïa ki jingthoh bym long pynpaw paidbah (confidential) ka lah ban poi ruh wat sha ki lad pathai khubor.
Na ka liang u Nongïalam ka Liang Pyrshah u la kynnoh ba kane ka jingleh jong ka EC ka dei tang da ki jingkynnoh ha ki social media, bad ba ki la pynkhreh ban pynshitom ïa iwei i ophisar tang namar kitei ki jingkynnoh.
Ha kajuh ka por na ka liang ka MDC jong ka Nongshken ka Kong Grace Kharpuri ka la ther tyngeh ïa ka EC kaba la pynmih ïa ka Showcause notice sha ka superintendent jong ka professional tax bad khamtam eh halor ka jingthad paidbah ïa kane ka notis.
Kane ka MDC ka la ong ruh ba katei ka dei ka jingjia ka bym pat ju jia ha ka history jong ka KHADC bad ka dei ruh kaba ktah ïa ka burom jong ka ophisar.
Ka la buh jingkylli ïa ka jingong jong u Chief Executive Member ba ïa ka jingtreikam baroh kawei la leh khlem ka jingtip jong ka EC, da kaba kdew ba u don u caretaker CEM ha katei ka por. Ka Kong Grace ka la ïasaid ruh da kaba ong ba lada ym don ka Executive Committee, kumta ka la dei ban don da ka Governor’s rule.
Nangta ka la pynrem ïa ka rai ban pynbna paidbah ïa katei ka showcause notice da kaba ong ba kane ka dei ka jingpynkhein ïa ka hok shimet jong itei i ophisar bad ka long ruh ka jingpynjah burom. Ka la kyntu ïa ka EC ba kan kiar na kum kine ki jingmlien.
“Haba ki ophisar ki pyndep ïa ka kamra, phim lah ban pynjah burom ïa ki. Mano pat ban pyntikna ïa ka jingshngaiñ jong ki haba ki trei la ka kamram?” ka la buh jingkylli.