Kam u CEM KAAC ba ka Lapangap ka hap ha West Karbi, dawa dorbar kyrpang ka VPP ha JHADC
Shillong, Risaw 19: Ki 8 ngut ki MDC ka seng saiñ pyrthei ka Voice of the People’s Party (VPP) kiba na Jaiñtia Hills District ki la ïasoi lang ïa ka shithi ba ki la phah sha u Chief Executive Member (CEM) ka JHADC u Bah Thombor Shiwat ban dawa ba dei ban khot da ka dorbar kaba kyrpang bad kaba donkam kyrkieh haba ïadei bad ki jingjia huri hura ba dangshen ha Lapangap, West Jaiñtia Hills, khappud ka Assam-Meghalaya ha kaba kane ka la pynthut bad pyndik ïa ka jingim ki nongrep ha kane ka thaiñ.
Kitei ki MDC ki la ong ba kane ka jingjia ha kane ka por jong ka aïom ot kba ka la wanrah ka jingbym shngaiñ bad kaba la pynheh shuh shuh ïa ka jinglong jingman. Ka VPP ka la ong halor kane ka kam, ka jingkren paidbah u CEM ka Karbi Anglong Autonomous Council (KAAC) uba la kyntait ïa ka jingkam ka Meghalaya lyngba ka khana pateng halor ka Block 1 bad Block 2 bad u la kam ba ka dang hab hapoh ka West Karbi Anglong bad kane ka la nang aiding shuh shuh ïa kane ka jingsngew ha kane ka thaiñ khappud.
“Haba pynpaw ka jinglong jingman jong kane ka jingjia, ngi ki dkhot ka District Council na ka VPP ngi dawa ba dei ban khot mardor ïa ka dorbar kaba kyrpang jong ka Jaiñtia Hills Autonomous District Council. Ka jingthmu kane ka dorbar kyrpang ka long ban ïakren bniah bha halor ka kam u pud u sam ka Lapangap bad ban shim ïa ka rai kaba pynskhem ba kane ka jaka kaba ïakajia ka hab hapoh u pud u sam kane ka Council. Kane ka rai ka long kaba kongsan khnang ban pynneh ïa ka jingsynshar laitluid, ban pynthikna ïa ka jingshngaiñ bad ki lad jingïada ïa ki nongshong shnong kiba shah ktah bad ban pynneh ïa ka shongsuk shongshngaiñ ha ka thaiñ,” pynpaw ka shithi ki MDC ka VPP.
Na ka liang jong ki, ki la kyntu ïa ka jingtuklar kaba kyrkieh jong u CEM halor kane ka kam bad ong ba ka jingpyndep ïa ka kam ha ka por kaba biang ka long kaba donkam bha khnang ban ïada shuh shuh na ki jingjia kiba kham heh bad kumjuh ruh ban ai ki lad jingïada ïa ka bha ka miat ki nongshong shnong ka Lapangap. “Ka jingïalam jong phi ban khot pynlong kloi ïa kane ka dorbar kan long ka jingai jingmyntoi ban lah pynbeit ïa kane ka jingeh kaba donkam bha ha kane ka por,” pynkut ka shithi ba la soi da ki MDC ka VPP.