Ki jingshah thombor ha khappud ki nangjur ngi donkam ïa ki mynsiem shynrang ban shakri

Nongpoh, Risaw, 19: Ki nongïalam ka Hynñiewtrep National Youth Front (HNYF) Northern Region ha ka sngi saitjaiñ ki la leit ban pynskhem syndon ïa 25 ngut ki nongïalam bad ki nongkitkam ba thymmai jong ka Umsning Circle ki ban khmih bad peit ïa ka eh ka shon jong ki paidbah ka thaiñ.
Ïa kine ki nongïalam ba thymmai ka seng HNYF Umsning Circle la pynskhem da u Bah Barnabas Manih Vice President HNYF Seng Kmie ha ka jingdonlang ki nongïalam ka Northern Region naduh u bah Hesting Lyngdoh, President, u Bah Robinson Umbah, Finance Secretary, Bah Donroi Kshiar Education Secretary, bad ha katei ka sngi la wan ruh ban ai mynsiem lang da u Bah Rocky Kylla, Chairman ka Umsning Town Dorbar lem bad kiwei kiwei ki nongïalam ka seng.
Ki nongïalam ba thymmai ka HNYF Umsning Circle, ki kynthup ïa u Josafair Lapang kum u President, u Bah Banpynshai Umbah, Vice-President, Aibanjoplang Thabah General Secretary, u Bah Gabriel Lapang kum u Asst General Secretary lem bad kiwei kiwei
Ha kane kajuh ka sngi la ïoh ruh ban pynskhem syndon ïa u samla Shiningstar Kyntla kum u Asst. Finance jong ka HNYF Northern Region.
Ha ka jingïalang ba la long ha kane ka sngi, ki nongïalam ba ha khliehduh ka seng ki la pynpaw ïa ka jingkmen kaba khraw halor ka jingdon jong ki 25 ngut ki samla shynrang kiba la kloi ban mih shakhmat bad ka jinglen lade na ka bynta ka Jaidbynriew. Ki la pynpaw ruh ba kine ki samla ki long kum ki symbai kiba la thung ha ka khyndew kaba sboh, kiba lah ban kylla long ki dieng ba seisoh na ka bynta ka lawei jong ka ri bad ka jaitbynriew.
Ha ka jingkren jong ki, ki la kdew ba ka thaiñ Ri Bhoi, kaba don khappud bad ka jylla Assam, ka ju mad man ka por ïa ki jingshah thombor bad ki jingeh bapher bapher. Kumta ka Seng ka donkam shisha ïa ki rangbah kiba don ka mynsiem shynrang ban shakri, kiba kloi ban ïeng ban ai ïa ka jingïada ïa ki paidbah, khamtam ha ki jaka khappud.
Ki nongïalam ki la kyntu ruh ïa ki nongkitkam jong ka seng ba kin long kiba ïatylli ka jingmut bad pynshlur ruh ïa ki baki dei ban long kiba kitkhia, kiba shaniah ha U Blei bad kiba kloi ban ïaid shaphrang na ka bynta ka bha ka miat jong ka imlang sahlang.