Nongpoh, Risaw, 19: Ha kawei ka jingjia aksiden kaba la jia mynta ka sngi ha surok bah National Highway ha ka shnong Umling, Ri-Bhoi District u wei u nongñiah auto u la duh noh syndon ïala ka jingim tang namar ka jingthurmur jong uwei u nongñiah trok u ba ñiah kali hapdeng ka jingbuaid bad pynher sted ïa ka trok haduh ba um lah ban tehlakam shuh bad leit tynrah beit nadien kawei ka auto rickshaw kaba dang ïaid lang ha surok.
Katkum ka khubor ba la ïoh lum la ong ba kane ka jingjia ka la jia ha ka por kumba 3 shiteng eiei mynta ka janmiet sngi u Blei ha ka katei ka trok kaba don ïa u number AS 01 SC 8025 ba la ñiah da u Nidajan Niang 35 snem ka rta na Shangpung, West Jaintia Hills ka dang kiew sha nongbah Shillong hynrei namar ka jingpynher sted u nongñiah um lah shuh ban tehlakam ïa ka kali bad leit tynrah beit nadien kawei ka auto rickshaw kaba don ïa u number ML 10 D 0206 ba la ñiah da u Sibu Dey 40 snem, na Byrnihat ryngkat bad uwei pat ba shonglang ba la tip kyrteng kum u Rofiqul Islam na Assam bad hap syndon sha nala katba katei ka trok ka la kylla lyndang syndon hapdeng surok.
Na ka liang ki pulit ka Nongpoh Traffic Police mar mar ki la hiar sha katei ka jaka bad pynkit noh ïa kitei kiba shong ha katei ka auto sha Civil Hospital Nongpoh, hynrei ki doctor ki la pynbna ba u nongñiah katei ka auto u la khlad noh namar ka jingjur ka jingmynsaw bad utei u ba shonglang u la mynsaw ha katei ka jingjia, katba u nongñiah trok um shym la mynsaw eiei hynrei la lap ba u la don hapdeng ka jingbuaid. Na ka liang ki pulit ki dang pynlong ka jingtohkit halor katei ka jingjia.
Lah ruh ban kdew hangne ba ki pulit ka Ri-Bhoi dang ha ki khyndiat sngi ki la maham tyngeh ïa ki briew kiba dih buaid bad ka ñiah kali kaba la wanrah shibun ki jingjia ba sngewsih bad ka jingduh noh ki mynsiem briew khlem dei por, hynrei kane ka jingjia ka la nang pynlong shuh shuh ïa ki pulit ban nang peitngor ïa ki paidbah kiba khlemakor ha ka por ba ñiah kali, da ka jingmaham kaba tyngeh.
