3,654 klur tyngka yn pynlut ka sorkar ban kyntiew ia ka pule puthi hapoh ka Jylla: Conrad Sangma

Nongstoiñ, Risaw 15: Ka Nongkharai Presbyterian Higher Secondary School, Umsohpieng kawei na ki shnong ha ka thaiñ Mawshynrut Constituency, ha ka sngi balang ka la ïoh ban plie paidbah ïa ka ïing skul thymmai kaba la tei da ka jingbei tyngka lyngba ka scheme NEC.
Ïa katei ka ïing skul thymmai la plie da u Conrad K.Sangma myntri rangbah ka jylla Meghalaya kum u kongsan, ryngkat ka jingïadonlang ruh u R.G.Momin MLA ka Rambrai Jyrngam, u bah Srally Rashir MDC ka Mawshynrut, u bah Garod LSN Dyke Deputy Commissioner ka West Khasi Hills District, u bah C Andronal Lyngdoh Principal ka Nongkharai Presbyterian Higher Secondary School bad kiwei kiwei ki ophisar.
Kum ka dak jong ka jingplie paidbah, u kongsan u la plie pyrda ruh ïa u Mawsahnam jong katei ka Shlem ryngkat ka jingïadonlang u bah Methodius Dkhar myntri ka Food Civil Supplies & Consumer Affairs Department kum u symbud kongsan.
Ïa katei ka jingïalang paidbah la pynlong ha phyllaw katei ka skul bad la pynïaid ïa katei ka jingïalang da u Rev A.Nongbri President ka Managing Committee katei ka Shlem.
La ong ba ïa katei ka skul la tei ha u snem 1966 bad dei u (L) Purno A Sangma u kpa jong u Conrad K.Sangma, u ba la noh synñiang nyngkong eh ïa katei ka shlem ha u snem 1988 haduh 75 hajar tyngka, mynba u dang dei kum u myntri rangbah ka jylla Meghalaya, ha ka por bad u ba bat ruh kum u myntri ka pule puthi jong ka jylla Meghalaya.
U Myntri Rangbah ka sorkar Jylla u Conrad K Sangma, haba ai jingkren ha jingïalang plie ïa ka building ba thymmai jong ka Nongkharai Presbyterian HSS ha Umsohpieng, u la pynpaw da kaba ong ba ka sorkar watla ka pynlut bun bha ka pisa ha ka pule puthi, hynrei ka eh pat ban pynïaid beit pynïaid ryntih namar ka jingkyllaiñ.
U la ong ba tang ha ka pule puthi ka sorkar ka pynlut haduh 3,654 klur bad na kane, kumba 2 hajar klur duna la pynlut tang ban siew tulop ïa ki nonghikai bad 917 klur ka pynlut manla u snem na ka bynta ban siew tulop ïa ki nonghikai deficit bad adhoc. Shuh shuh 684 klur na ka bynta ki skul sorkar bad 366 klur na ka bynta ki skul SSA bad kine ki jingkheiñ ki dang ïai kiew na ka por sha ka por.
U la ong ba watla ka sorkar ka pynlut bun ha ka pule puthi hynrei ka jingmih pat kam long katkum ka jingkhmih lynti bad ka don shibun ki daw. U la ong ruh ba um kwah ban kynthoh ïano ïano namar ka pule puthi ka dei ka sobjek kaba ïar bad kaba eh bad kyllaiñ bha ban ïakren.
“Ngi don haduh 14,582 tylli ki skul bad 55 hajar ngut ki nonghikai bad ngi don haduh kumba 20 jait ki skul bad kumba 25 tylli ki kynhun lane Association jong ki nonghikai”, ong u Myntri Rangbah.
“Tang ha kawei ka shnong ki don laiphew jait ki skul ba la pynïaid da ki kynhun bapher bapher, kaba pynlong ban duna khynnah ha ki skul bad bun ki nonghikai. Kane ka la ïaid palat 50 snem mynta bad ka jingdon ki skul bad lai phew jait, ka wanrah jingeh ïa ka sorkar hynrei watla katta ka sorkar ka dang pyrshang ban pynbeit”, u la ong.