Nongpoh, Risaw, 12: Ha ka jingbteng ïa ka jingtohkit halor ka jingshah pynïap i heprit 13 snem ha kawei na ka shnong ha Ri Bhoi, ki Pulit ka Ri Bhoi ha ka sngi U Blei hapoh ka jingïalam u Senior Superintendent of Police VS Rathore ha ryngkat ka jingdon lang u Additional SP Bah Orville Massar lem bad ka kynhun Pulit ki la ïalam ïa u runar ba la ïoh kem uba la tip kum u Ïainehskhkem Kharsati sha ka jaka kaba u la pynïap bad leh ïa ki kam bymman ïa i heprit haduh ban da khladnoh na ka sla pyrthei.
Kane ka jingïalam jong ki Pulit ka Ri Bhoi ïa u runar ka dei shi bynta ka jingtohkit ban pynshisha ne ban pyni ha kano ka rukom u la leh ïa ka kam bymman kaba la poi shaduh u pud jong ka jingïap noh i heprit.
Ha kane ka sngi, ki Pulit ka Ri Bhoi ki la ïalam ïa u runar sha kawei ka khlaw kaba u la leh ïa ka kam bymman bad kane ka dei ruh hadien shi sngi ba ki Pulit ka Ri Bhoi ki la ïoh ban kem ïa u.
Nalor ki heh Pulit ka Ri Bhoi la don lang ruh ka kynhun Forensic Crime Scene Unit ka tnad Pulit kiba la leit lang sha ka jaka na ka bynta ban lum ïa ki sakhi satar ba u runar u la leh ïa ka kam bymman pyrshah ïa i Heprit.
