New Delhi Risaw 12: Da kaba ai ka jingkyrshan kaba khraw ïa ka kam ri jingri bad ka kam dud jong ka ri India, la plie paidbah ïa ki projek kiba shongdor T.947 klur bad la buh maw nongrim na ka bynta kawei pat ka projek kaba shongdor T. 219 klur ha New Delhi ha ka 11 tarik u Risaw, 2025. ïa kine ki sienjam, kiba long shi bynta jong ka song kaba kham heh jong ka jingbei tyngka ha ka kam rep bad ki bynta ba ïadei bad ka rep ka riang, la pyllait paidbah da u Myntri Rangbahduh ka ri u Narendra Modi.
Ïa kine ki projek la aiti sha ka ri ryngkat bad ka jingplie paidbah ïa artylli ki skhim ba kongsan ba ïadei bad ka kam rep- ka Pradhan Mantri Dhan Dhanya Krishi Yojana (PM-DDKY) bad ka Mission for Aatmanirbharta in Pulses, kaba pyni ïa ka jingkut jingmut jong ka sorkar ban pynkhlaiñ ïa ka kamai kajih ha ki jaka nongkyndong bad ban kyntiew ïa ka thong jong ka India na ka bynta ka jinglah ban kyrshan dalade ha ka kam rep bad ki kam ba ïadei bad kane.
Ha ka jingai jingkren jong u sha ka ri, u Myntri Rangbahduh ka ri u Narendra Modi u la ong ïa ka bynta ba kongsan jong ka kam ri jingri, kam ri dohkha, bad ki kam ba ïadei bad kane ha kaba pynkhlaiñ ïa ka kamai kajih ha ki jaka nongkyndong hapoh ka Pradhan Mantri Dhan-Dhanya Krishi Yojana (PM-DDKY). U la ong, “Ka PM Dhan-Dhanya Krishi Yojana ruh ka peit bniah ïa ki jingri jong ngi. Phi tip, palat 125 klur tylli ki dawai tika la ai khlem jingsiew ban ïada ïa ki jingri na ki jingpang kum ka jingpang kjat bad shyntur. Namar kane, ki jingri ki la long kiba koit ba khiah bad ka jingkhuslai jong ki nongrep ruh ka la duna. Hapoh ka PM Dhan-Dhanya Krishi Yojana, yn sdang ruh ïa ki campaign kiba ïadei bad ka koit ka khiah jong ki mrad ha ki shnong ki thaw.”
U Myntri Rangbahduh u la ban jur ïa ka jingdonkam jong ka jingpynkylladur na ka bynta ka roi ka par ha ki nongkyndong, da kaba ong, “Ha ki jaka bym lah ban rep, kan donkam ban kyntiew ïa ka kam ri jingri bad kam ri dohkha. Ban kyntiew ïa ka ïoh ka kot jong ki nongrep, ka sorkar jong ngi ka plie ki lad ki lynti ki bym sahkut ha tang ki rukom rep tynrai. Kumta la pynleit jingmut ha ka kam ri jingri, kam ri dohkha bad kam ri ngap na ka bynta ban ïoh kamai shuh shuh. Kane ka ai bor ruh ïa ki nongrep kiba rit baria bad ki longïing ki bym don jaka.”
Kawei na ki mat ba kongsan ka long ka jingplie ïa ka IVF Laboratory ba nyngkong eh ha ka thaiñ shatei lammihngi, kaba la seng ha Guwahati, Assam hapoh ka Rashtriya Gokul Mission (RGM) ha ka jingbei tyngka kaba T.28.93 klur. Kane ka jaka kaba la biang katkum ka juk mynta kan ai ka jingkyrshan kaba khraw ïa ka jingkyntiew ïa ka kam ba ïadei bad ka dud bad ban kyntiew ïa ki jait jingri ha ki jylla ba shatei lammihngi.
Hapoh ka National Programme for Dairy Development (NPDD), la plie paidbah ruh ïa ki projek jingdon jingem kiba bun ba ïadei bad ka kam dud. Kine ki kynthup ïa ka projek Mehsana Milk Union kaba kynthup ïa ka Karkhana Dud Powder kaba 120 metric ton ha ka shisngi bad ka UHT Plant kaba 3.5 lak litar ha ka shisngi kaba la shna ha ka jinglut kaba T. 460 klur; ka Karkhana pynmih Dud Powder kaba 30 ton ha ka shisngi kaba la seng da ka Indore Milk Union ha ka jinglut kaba T. 76.50 klur; ka UHT Plant kaba pynmih 25,000 litre ha ka shisngi kaba la seng da ka Bhilwara Milk Union ha ka jinglut kaba T. 46.82 klur; bad ka Green field Dairy Plant ba la shna ha Nustulapur, Karimnagar, Telangana ha ka jinglut kaba T.25.45 klur. Da kaba pynïar shuh shuh ïa ka kamba ïadei bad ka dud, la buh maw nongrim na ka bynta ka Integrated Dairy Plant bad ka jaka pynmih bam masi kaba 200 TPD ha Kuppam Mandal, Chittoor District, Andhra Pradesh, da ka jingbei tyngka kaba T.219 klur hapoh ka NPDD.
Hapoh ka Animal Husbandry Infrastructure Development Fund (AHIDF), la plie 10 tylli ki projek kiba shongdor T.303.81 klur ha kylleng ki jylla, kaba pynkhlaiñ ïa ka bor jong ka ri na ka bynta ka jingpynbiang jingbam ïa ki jingri, ka dud, bad ka jingpynkhreh ïa ki mar ma ïoh na ki jingri. Ban pynkhlaiñ shuh shuh ïa ka jingpynpoi ïa ki jingshakri sha baroh ban pynroi ïa ki jingri, la ai syrnod ïa 2,000 ngut ki MAITRI (Multipurpose Artificial Insemination Technicians in Rural India) kiba dang dep shah hikai bad pyntbit na baroh ki district jong ka Uttar Pradesh da u Myntri Rangbahduh ka ri u hapoh ka Rashtriya Gokul Mission. Kane ka jingïalang ka la long ruh ka dak jong ka jingsdang ïa palat 38,000 ngut ki MAITRI ha kylleng ka ri India, kaba pyni ïa ka mawjam kaba kongsan ha kaba kyntiew ïa ka jingkyntiew ïa ki jingpyndonkam ïa ka jingstad science ban pynroi ïa ki jingri bad ka jingkyntiew ïa ki jingri ha kylleng ka ri.
Kine ki sienjam ki pynpaw ïa ka jingkut jingmut jong ka sorkar ban pynïar ïa ki lad ki lynti na ka bynta ki nongrep lyngba ka jingkyntiew ba ïasnoh lang bad kaba neh jong ki bynta ba ïadei bad ka kam rep, ban pynthikna ïa ka jingshngaiñ ha ka ïoh ka kot bad ka bha ka miat na ka bynta baroh.
