Nongpoh, Risaw, 03: Kum ka jingrakhe ïa ka Youth Week bad ka Youth Sunday bad ruh ban kyrshan a ka Balang ka ban sa pdiang ïa ka Synod ha u snem 2027, ka CE Society Umdihar mynta ka sngi ka la pynlong da ka tamasa bam tynrai na ka bynta ban pyntyllun ïa ki kam ka Society bad ruh ban pynmih pisa na ka bynta ban kyrshan ïa ka Balang Presbyterian Umdihar ka ban sa pdiang ïa katei ka jingïaseng Synod.
Ha kane ka sngi, naduh ki samla, ki longkmie ki la mih ban wan rah ïa ki jaid jingbam bapher bapher ban pynïaid iew ha kane ka tamsa pyni nam ïa ki jaid jingbam bapher bapher, ba ki la buh la ki jong ki jong ki dukan marbam ban pynphuh pynphieng ïa kane ka tamasa pyni nam ïa ki jingbam.
La wan ruh ban plie ïa kane ka tamsa pyni nam ïa ki jingbam da u Dr. David Lyngdoh, uwei na ki riew rangbah ka Ri Bhoi kum u kongsan bad la sakhi lang da ka jingdon lang ki tymmen Basan, ki longkmie, ki samla bad ki nongïalam ka CE Society ka Balang Presbyterian Umdihar.
Kumba la pynpaw da u Tbn. S.S Lapang, ka daw kaba la pynlong ïa kane ka tamasa pyni nam ïa ki jingbam ka dei shi bynta ka jingrakhe ka CE Society ïa ka Youth Week bad Youth Sunday, ha kaba kum ki samla ki pynlong khnang ïa kane ka tamsa ka long ban pynmih pisa kyprang na ka bynta ka jingpyntyllun ïa ki kam ha kaba ïa dei bad ka kam jong u Blei.
U la ong ruh kyrpang ruh lyngba kane ka Tamasa, ki khun samla ki ïa trei ryngkat ban pynmih pisa na ka bynta ban kyrshan ruh ïa ka Balang Presbyterian Umdihar, ka ban sa pdiang ïa ka jingïaseng Synod ha u snem 2027 ha ka Balang Presbyterian Umdihar.
U la bynrap ruh da kaba ong, ba u kyrmen skhem ba ki samla lyngba kane ka tamasa kin lah ban kyrshan ïa ka Balang ha kaba kum ka Balang kan pdiang ïa ka jingïaseng Synod, kaba dei kawei na ka kam kaba khraw ba kum ka Balang kan pdiang ïa ka jingïaseng Synod kaba long ka jingmyntoi na ka bynta ki paid riewngeit jong ka Balang bad ha ka Ri Bhoi Synod hi baroh kawei, u la bynrap.
