Nongpoh, Nailur, 28: Kawei ka trok kaba kit ia u Coke kaba don ia u registration number ML 05 AB 9564 katba ka dang hiar sha ki thaiñ Guwahati ka la kylla lyndang ha ki bynta jong ka surok bah National Highway 6 ha ka shnong Umsawnongkharai, Ri Bhoi District hadien ba ka la dep tynrah ïa kawei ka Alto kaba don ïa u registration number ML 04 C 8496.
Katkum ka jingtip bala ïoh lum la ong ba kane ka jingjia ka la jia hynnin ka sngi ka la por kumba 12 baje eiei mynsngi ha kaba u nongñiah u la kum pynhap ïa ka pisa na jrong ka trok bad katba u dang thmu ban tam biang ïa katei ka pida da kaba pyniaid biang ïa ka kali shadien u la kum tynrah ïa kawei ka Alto haduh ba ki bynta ba hakhmat ki la julor.
Na ka jingsheptieng halor katei ka jingtynrah bad julor katei ka Alto, na ka liang u nongñiah katei ka trok u la pyrshang ban phet krad na katei ka jaka bad namar ka jingpher sted um lah shuh ban tehlakam ïa ka kali haduh ba kan da kylla syndon ha surok bah ha ka jaka ba kham khongdong bad na ka liang u nongñiah u la phet krad syndon ïalade na katei ka jaka.
Ki Pulit ka Nongpoh Traffic Police tang hadien katei ka jingjia ki la leit mar mar sha katei ka jaka ban pynlong ka jingtohkit bad tan noh ïa katei ka kali bad ka jingtohkit ban lapdien ïa u nongñiah katei ka trok ka dang ïaid shakhmat.
