Ki mat ba kongsan
Ha ka 24 tarik u Nailur, 2025, ha ka jingïalang jong ka Kynhun Myntri jong ka Sorkar Pdeng, la ai jingmynjur na ka bynta 10,023 tylli ki medical seat ba thymmai ha ka jingbei tyngka kaba T. 15,034 klur, kum shi bynta ka thong ban pynbiang 75,000 tylli ki medical seat.
Ka jingdon ki Medical kolej ka la kiew ar shah sha ka 808 ha u 2025-26 na ki 387 tylli ha u 2013-14, ki undergraduate seat ki la kiew 141% bad ki postgraduate seat ki la kiew 144%.
Ki kyndon 2025 ba thymmai ka plié lad ïa ki specialist na ka Sorkar kiba la trei slem ha ka kam ba kin long ki professor khlem da donkam ïa ka residency.
Kane ka sienjam ka thmu ban pynbiang ïa ki jaka ba duna ka jingai jingshakri bad ka kyntiew ïa ka India sha ka kyrdan jong ka ri kaba biang tam ha ka pyrthei na ka bynta ka jingai jingsumar kaba jemdor.
Ha kaba sdang, ka India, kaba don 1.4 billion ngut ki briew, ka ïakynduh ïa ka jingeh ban pynthikna ïa ka jingai jingsumar ïa baroh. Ki briew bapher bapher kiba sah ha ki jaka rilum bad ki shnong ba jngai kim ïoh ïa ka jingsumar kaba bha namar ka jingbym biang ki doktor bad ki specialist.
Haba ïohi ïa kane ka jingduna kaba heh, ka sorkar jong u Myntri Rangbahduh ka ri u Narendra Modi ka la sdang ïa ka jingpynïar ïa ki lad ai jinghikai ha ka liang ka koit ka khiah kaba khlem pat ju ïohi mynno mynno ruh. Ha ka 24 tarik u Nailur, 2025, ka kynhun myntri jong ka sorkar pdeng ka la mynjur ïa ka jingthmu kaba kongsan ban pyndap palat 10,000 tylli ki medical seat ba thymmai ha kylleng ki kolej bad ki hospital sorkar kiba la don lypa, ha ka jingbei tyngka kaba T 15,034 klur ha ki saw snem. Kane ka sienjam ka dei shi bynta jong ka jingthmu kaba kham heh ban pynbiang 75,000 tylli ki medical seat hapoh ki san snem ban wan.
“Ka jingmynjur ïa ka Phase-III jong ka Skhim ba la bei tyngka da ka sorkar pdeng kan pynbiang ïa ki medical seat PG bad UG kiba kongsan. Kane kan kyntiew ïa ka rukom sumar nongpang jong ngi bad kan kyntiew ïa ki lad jinghikai ha ka liang ka koit ka khiah. Kan pynthikna ba man la ka bynta jong ka ri India kan don ki doktor kiba tbit.
Myntri Rangbahduh Narendra Modi ha ka post ha ka X, Nailur 24, 2025, “Ka ri ka la pynïar shibun ïa ki jingdon jingem na ka bynta ka jingsumar jong ka ha kine ki shiphew snem ba la dep, hynrei ka jingdawa ka dang ïai bteng bad ka kham jur ban ïa ka jingpynbiang.”
Ka jingpynbun ïa ki Medical Seat
Ka jingsumar nongpang ba pura na ka bynta 1.4 billion ki briew ka shong ha ki lad ai jingsumar kiba bha bad kiba baroh ki lah ban ïoh bad ruh ka bor treikam kaba tbit bad kaba la pynbiang.
Ban plié lad ïa baroh ban ïoh ïa ka jingsumar -khamtam eh ha ki jaka nongkyndong, ki riewlum bad ki shnong kiba eh ban poi – ka kynhun myntri jong ka sorkar pdeng hapoh ka jingïalam jong u Myntri Rangbahduh Modi ka la mynjur ban pynbiang shuh shuh ïa ki 5,000 tylli ki medical seat post-graduate bad 5,023 tylli ki medical seat undergraduate ha ki kolej bad ki hospital sorkar kiba la don lypa shuwa u snem 2028-29.
Ka jingbei tyngka baroh na ka bynta kane ka jingpynïar ka long T. 15,034 klur, kaba kynthup ïa ka por naduh u snem 2025-26 haduh u snem 2028-29. Na kine, 68.5%, kaba kot sha ka T. 10,303.20 klur yn bei da ka sorkar pdeng, katba kaba sah T. 4,731.30 klur yn noh synniang da ki jylla. Ka jingbei tyngka na ka bynta man ka seat ka long T. 1.5 klur tyngka.
U Myntri Rangbahduh Modi, u thmu ban pynbiang sa 75,000 tylli ki medical seat ha ki san snem ban wan, bad kane ka jingmynjur kaba thymmai kaba la wan ha ka 24 tarik u Nailar, 2025, ka dei ka sienjam ban kot sha katei ka thong.
Ki jingmyntoi bad ka jingktah
Ki shnong kiba duna ka jingshakri kin ïoh jingmyntoi na ka jingpynbiang ïa ki nongtrei ba tbit ha ka liang ka koit ka khiah, khamtam eh ki specialist. Ka jingpyndonkam ïa ki jingtei kiba la don lypa ka long kaba pynduna ïa ka jinglut bad ka kyntiew ïa ka jingwanrah ïa ki nongtrei ha ki thaiñ kaba ïadei.
Kiwei kiwei ki jingmyntoi bad ki jingktah ki long:
Ki samla pule kiba kwah ban pule doktor kin ïoh kham bun ki lad ban pule doktor ha India.
Yn pynbha ïa ka jingpule ha ka liang ka koit ka khiah bad kan ïahap bad ki jinglong jingman ha kylleng ka pyrthei.
Da kaba kham bun ki doktor bad ki specialist, ka India ka lah ban long ka jaka ba kongsan ban ai jingsumar kaba jemdor bad kane kan kyntiew ïa ka pisa kaba wan nabar ri.
Ki jaka nongkyndong bad ki jaka ba jngai kiba duna ka jingshakri kin ïoh ïa ka jingsumar kaba suk ban ïoh.
Ki kam ba thymmai kin mih (ki doktor, ki nonghikai, ki nongai jingsumar, ki nongwad bniah, ki nongpynïaid bad ki jingshakri ba ai jingkyrshan).
Ka roi ka par ha ka imlang sahlang jong ka India kan nang khlaiñ da ka jingkyntiew ïa ka lad ïoh jingsumar.
Ïa ki jingdon jingem ha ka koit ka khiah yn sam mar katjuh ha kylleng ki jylla bad ki union territory.
Ki jingdon jingem ba dang kiew jong ka India ha ka kam ai jingsumar
Ka ri India ka don bun tam ki medical kolej (808) bad ka la nang pynïar ïa ki lad jinghikai ai jingsumar jong ka la bun snem mynta.
Ki don 1,23,700 tylli ki seat MBBS (Bachelor of Medicine, Bachelor of Surgery) mynta. Ha ki shiphew snem ba la dep, la pynbiang shuh shuh sa 69,352 tylli ki seat, kaba kiew da 127%. Ha kane ka por la pynbiang 43,041 tylli ki seat post-graduate, ka jingkiew kaba 143%.
22 tylli ki All India Institute of Medical Sciences (AIIMS) kiba thymmai la mynjur hapoh ka Pradhan Mantri Swasthya Suraksha Yojana, kaba thmu ban pynthikna ïa ka jingsumar ba jemdor bad kaba lah ban shaniah kaba baroh ki lah ban ïoh bad ban kyntiew ïa ka jingpule ha ka liang ka jingsumar ha ka ri.
Ban plié lad ïa ka jingwanrah ïa ki nonghikai ba thymmai, ka National Medical Commission ka la pyntip ïa ki kyndon Medical Institution (Qualifications of Faculty) Regulations, 2025 ha u bnai Naitung.
Ïa kine ki kyndon la shna khnang ban pynïar ïa ka jingdon jong ki nonghikai, ban pynsuk ïa ka jingpynbun ïa ki seat undergraduate (MBBS) bad postgraduate (MD/MS) ha ki medical kolej ha kylleng ka ri India bad ban pynurlong ïa ka thong ban ïoh 75,000 tylli ki medical seat ba thymmai ha ki san snem ban wan.
Katto katne ki jingpynkylla kiba kongsan kiba la wan lyngba ki kyndon ba thymmai ki long: Ki hospital Sorkar ki bym ai jinghikai kiba don palat 220 tylli ki jingthiah nongpang ki lah mynta ban long ki jaka ai jinghikai.
Ki specialists kiba la don lypa kiba la trei 10 snem ki lah ban shah thung kum ki Associate Professor, bad kito kiba la trei 2 snem ki lah ban shah thung kum ki Assistant Professor-khlem ka Senior Residency- lada ki la pyndep ïa ka Basic Course ha ka Biomedical Research (BCBR) hapoh ar snem.
Ki Senior Consultant kiba la ai jinghikai lai snem ha ka jaka ai jingsumar jong ka Sorkar kaba la ithuh da ka NBEMS ki lah ban long ki Professor.
Ki medical kolej jong ka Sorkar ki la ïoh jingbit ban sdang ïa ki UG bad PG course ha kajuh ka por kaba pynsted ïa ka jingpynbiang ïa ki nongai jingsumar bad ki nonghikai.
Ha ryngkat ka Anatomy, Physiology, bad Biochemistry, ki tnad Microbiology bad Pharmacology ki lah ban thung ïa ki nonghikai kiba la pyndep ïa ka MSc-PhD.
Ki nonghikai kiba la dep ïa ka super specialty kiba dang trei ha ki tnad broad specialty ki lah ban long ki nonghikai ha ki tnad super specialty kiba ïahap bad ki jingpule jong ki.
Ka jingpynkut
Ka jingmynjur ba dang shen ïa ki 10,023 tylli ki medical seat ba thymmai ka dei kawei pat ka sienjam khnang ba ka India kan ïoh ïa ka jingsumar nongpang ba pura, bad ka wan hadien ki sienjam bapher bapher jong ka ri ha kine ki shiphew snem ba la dep. Ka pyni ïa ka jingangnud jong ka Sorkar India ban weng ïa ka jingduna kaba jur jong ki nongtrei ha ka koit ka khiah, khamtam ha ki jaka nongkyndong bad ki riewlum kiba duna ka jingshakri, da kaba pynkylla ïa ka India sha ka jaka pdeng na ka bynta ka jingai jingsumar ha ka pyrthei.
Ka jingktah kan long kaba jylliew; ka jingpynbha ïa ki jingpule ha ka liang ka koit ka khiah, ka jingpynbun ïa ki lad kamai ha baroh ki bynta jong ka koit ka khiah, bad kaba kongsan tam, ka jingpynbha ïa ka koit ka khiah jong ki klur ngut ki nongshong shnong kiba la mad ïa ki jingeh ban ïoh ïa ka jingsumar kaba bha.
