Ym sngewtynnad ki nong Daistong ïa ki sengbhalang kiba leit tur sha Secreteriat

Khliehriat Jymmang 19: Ki nongshong shnong kiba na shong Daistong East Jaiñtia Hills District kiba kyrshan pura ïa ka public hearing jong ka Shree Cement Ltd na ka bynta ban khlong mawshun na Lumshyrman, ki la ong ba ka public hearing ka ban long ha ka 22 tarik mynta u bnai Jymmang kan ïaid beit shakhmat kumba la pynbna, ki la pynpaw ruh ïa ka jingbym sngewtynnad jong ki ïa ka jingleit tur ki sengbhalang bad ki paidbah sha Secreteriat kiba la dawa ban pynduh pyndam ïa ka public hearing.
Haba kren sha ki pathai khubor, u bah Himon Pajuh u la kyntu jur ïa ki kynhun sengbhalang khamtam ka Jaiñtia National Council bad ka Jaiñtia Students Union da kaba ong ba “Ha ka sngi ba long Public hearing na ka bynta ka jingtih mawshun ha Block -I wat wan ban tur bad dei ban ieh ha ka jingstad jong ngi ka elaka ngi lah tip hi ma ngi bad lada tur ngim don ka jingkitkhlieh, wat batai than ïa ka jingpynbeit ka elaka, lada don kata ka jingstad to stad hala ka jong ka elaka, hala ka jong ka ïing ka sem bad ïa ka jingnang jingstad ba phi don to pyndonkam bha wat long kiba shah ialam bakla”
U bah Jesper Pajuh, na ka shnong Daistong u la ong ba “U Blei u la ai ïa ki maw ban pyndonkam namar baroh kiba ai u Blei ki dei kiba donkam bad ha public hearing ruh naduh kaba sdang ngi la dep mynjur lang bad haduh ka 22 tarik ruh ngin ïeng tylli, kino kino ki seng ruh kum ki sengbhalang ngin nym shah ban wan shapoh elaka, namar hapoh ka elaka kam don kano kano ka kynrum kynram hynrei don tang uwei ar ngut eh bad kita ruh ki dei kiba la shah ialam bakla, ngi hapoh elaka ngi shongsuk shongsaiñ”
U bah Kerki Sutnga, u la kynthoh jur ïa ki sengbhalang da kaba ong ba “kito kiba leit sha Secreteriat ki dei ki bym don nongrim, namar naduh ba sdang hi ngi la dep pynbeit ïa ka kam da ka elaka ha kaba baroh shiphew tylli ki shnong ki la dep ïa soi bad ïa mynjur lang, hynrei don uwei ar ngut eh uba ialam bakla ïa ki briew, kim dei ban tuklar ïa kane ka kam bad ha ka 22 tarik ruh ka public hearing kan iaid beit”.
U bah Hiwon Pajuh u la ong ba “ka dorbar elaka naduh ba sdang ngi la iaid lynti da kaba shuk ba kmen, nga sngewnguh ïa ka elaka kaba la wanrah ïa kane ka company bad kane kan wanrah ïa ka roi ka par ha ka district khamtam hapoh ka elaka khamtam ha ka ioh kam ioh jam, nga ngeit ba baroh ki khun ka district khamtam ki khun ka elaka kin ioh kam ha kane ka company, kumta wat pynklumar ïa kane ka kam khnang ba ka dong ka thaiñ ka kiew ha ka roi ka par ban lait na ka duk ka kyrduh, nga kyrpad ïa kito kiba pyrshah ban shim khia ban iarap khamtam ki sengbhlang kiba ju iarap ba kin sngewbha ban peit bha bad ban bishar bha ha shwa ban pyndam ïa kano kano ka kam bad sngewbha iakynduh shwa ïa ki nongpyniaid elaka bad iakren lada bakla dei ban pynbeit hynrei ban shu leh klumar kumto da kaba dawa ban pyndam ïa ka public hearing kato te ka bym iahap, nga pyrshah ïa kane ka jingdawa pyndam public hearing,
Kiba la ai jingkren ki kynthup ruh u bah Ameriki Sukhlain bad kiwei kiwei kiba la kyrshan puta ïa ka public hearing jong ka company Shree Cement Ltd bad ong ba ka public hearing kan ïaid beit ha ka 22 tarik.