Pynrem jur u rangbah na Daistong ïa u Secretary ba khanglad ïa ki sengbhalang ban rung hapoh Elaka

Khliehriat Jymmang 19: Ki paidbah nongrep kiba na ki shnong kiba hap hapoh ka elaka Nongkhlieh ha ka jing kren sha ki pathai khubor mynta ka sngi ha shnong Shnongrim, ki pynpaw ka jingpyrshah jur ïa ka jingong u Secretary Elaka Nongkhlieh, u bah F.Bareh uba la ong ba baroh ki trai jaka ki la ïa beit ban ai jaka sha ka company Shree Cement Ltd bad u la kam ruh ba ka elaka ka la dep pynbit pynbiang bad leh ïa baroh kaba donkam ha kaba ïadei bad ki jaka puta.
Uwei na ki riew rangbah uba na ka shnong Daistong, u bah Medawan Sukhlain u la ong “nga pynrem jur ruh ïa ka jingkren u Secretary Elaka Nongkhlieh uba la khang pyrshah ïa ki sengbhalang ban wan rung hapoh ka elaka Nongkhlieh namar hapoh ka elaka ym ju don kum kata kaba yn beh ne yn ym shah ïa ki sengbhalang ban rung shapoh ka elaka, shuh shuh, ha kaba ïadei bad ka jingthmu ban khlong mawshun ka company Shree Cement, ngi kum ki nongshong shnong na Daistong kiba don jaka ha Lumshyrman ngi pyrshah jur ïa ka jingleh ka elaka kaba la khot sop sop ïa ka jingialang ha Moolasngi kaba la pynlong myn ha ka 16 tarik mynta u bnai”
Na ka liang u bah Bunlangki Sukhlaiñ, u la ong ” ngi kum ki paidbah nongrep kiba napoh ka elaka Nongkhlieh ngi sngewphylla bad sngew kyndit haba ngi sngew ïa ka jingkren bad jingpynpaw u Secretary ka elaka Nongkhlieh, u bah F. Bareh uba la ong ba ka la don ka jingiabeit bad ki trai jaka bad dep ruh ban siew ïa ka bai jaka rep, hynrei ngi ngim lah ban pdiang ïa kane bad ngi pyrshah jur ïa kane ka jingkren u Secretary Elaka bad ruh ka jingkren jong u ka dei kaba shu kren thok shukor bad kane ka dei ka jingïalam bakla ïa ki paidbah ka elaka bad ïalam bakla ruh ïa ka imlang ka sahlang.
U la ong ruh ba naduh mynshwa ki paidbah nongrep kim pat don kano kano ka jingdie jaka sha ka company Shree Cement bad ong ruh ba kiba bun na kito ki briew kiba la ïa don ha shnong Moolasngi myn ha ka 16 tarik ki dei ki briew ki bym don jaka ha Lum Shyrman katba ki nongshong shnong kiba na Shnongrim kiba da ki spah ïing ki don hok ban kam trai ïa ki jaka ha Lum Shyrman, u bah Bunlangki u pynrem jur ïa ki dkhot ka elaka khamtam u Secretary Elaka u bah F. Bareh.
Kumjuh ruh u Bah Snengbha Rupon, uba na shong Tongseng (Nongkhlieh) u pynrem jur ïa u secretary elaka Nongkhlieh, u la ong ruh ba kum u khun ka elaka Nongkhlieh u khlem ïoh jingtip ei-ei ban don kato ka jingïalang ha shnong Moolasngi myn ha ka 16 tarik u bnai jymmang ha kaba la pynsngew ban kan don ka jingsiew ïa ka bai jaka sha ki trai jaka, u la kynnoh ruh ba ka jingïalang ba la pynlong ha Moolasngi ka dei ka jingïalang ba la pynlong sop sop kaba khlem pyntip paidbah ïa baroh ki trai jaka.
U Bah Sony Pyrngap u la ong bad kynnoh ba ki nongïalam ka elaka haba kren ha dorbar ki ong da kumwei katba ki kam ba ki leh ki long da kumwei, u la kyrpad ïa ki nongïalam ka elaka ba kin kylla kaba mut ban nym ailad ïa uba na bar ban wanrah ïa ka jingïashoh ïadat para doh para snam, u kyntu ïa ki nongïalam elaka ba kin long kiba sngewthuh khnang ba ka elaka Nongkhlieh kan long kaba ïatylli, kaba kiew ha ka roi ka par kaba lait na ka jingïaklumar bad kynnoh ba ki nongïalam Elaka kim ïaid katkum ka jingmut ban wanrah ïa ka bha ka miat, ka suk ka saiñ.
Ka longkmie na Shnongrim, ka kong Hanidabiang Sukhlain ka pynpaw ka jingsngewsih kthang haba pyrkhat ïa ka jingduh jingdam ki jaka rep ba ka ju rep, ka jingduh jingjulor ki tyllong um bam um dih lada ka company Shree Cement kan leh ïa ka jingtih mawshun na ki jaka ba don ha Lumshyrman, ka la pynpaw ruh ïa ka jingsngew bynñiaw ban duh noh ïa ka mariang kaba itynnad kaba dap da ki dieng ki siej, ki tyllong um kiba pynmih ïa ki um ba bang ba shngiam, ki krem ki kroh kiba don ha ka thaiñ, ka la kyntu jur ïa ki paidbah nongshong shnong jong ka shnong Lum Bangla, Khaidong bad kiwei kiwei ki shnong bamarjan ki dih um na ki tyllong um jong ka tnat P.H.E, jong ka JJM ba ki dei ban pyrkhat bha ïa kane namar lada jia ba wanpoi ki briew kiba na bar kin sa pynjot, pynjakhlia ïa ki um bam um dih baroh.
Baroh kitei kiba la ai jingkren bad kiba la poi sha ka jingialang ba la pynlong ha Shnongrim ki la pynpaw ruh ba ki pyrshah jur ïa ka public hearing jong ka company Shree Cement kaba yn sa pynlong la 22 tarik mynta u bnai Jymmang ha Lum Shyrman, Elaka Nongkhlieh ha kaba kane kan dei ka public hearing kaba na ka bynta ban khlong ïa u mawshun na Lum Shyrman Block-1.