Shillong, Nailur 22: U Myntri ka tnat Pule Puthi ka jylla u Bah Lahkmen Rymbui ula kyntait ban kren ne kynthoh eiei halor ka jingkynnoh ba ka University of Science & Technology Meghalaya (USTM) ka kyntur pud sha ka jaka jong ka tnat Khlaw, haba pynpaw ba kane ka kam ka dang don ha ka jingbishar ka Ïingkashari.
Ka Central Empowered Committee (CEC) ba la thung da ka Ïingkashari Supreme Court ka la ai jingmut ban daiñ kuna ba T.150 klur ïa ka USTM namar ka jingpyndonkam ïa ka jaka khlaw khlem da ïoh ïa ki jingmynjur ba donkam.
Katkum ka kaiphod ka CEC ka pynpaw ba ka USTM ka la kyntur jan kumba 25 hectare ka jaka khlaw ha Ri-Bhoi District, kaba pynkheiñ ïa ka Forest Conservation Act, 1980.
Ka Committee ka la kyrpad ïa ka Supreme Court ban bthah ïa ka USTM ba kan thung dieng biang ha ki jaka ba shah ktah ba kin long khlaw biang kumba ki long hapoh ka shisnem nalor ban siew ïa ka kuna.
Haba kren sha ki lad pathai khubor ha ka sngi Nyngkong, u Bah Rymbui ula ong ba ka Sorkar kam lah ban kynthoh ne kren eiei halor kane ka kam tad haduh ban da pynmih hukum da ka Ïingkashari Supreme Court.
“Kane ka dei ka mukotduma ba don ha Ïingkashari Supreme Court. Katba ka Ïingkasahri kam pat ai ïa ka hukum, ngam lah ban kynthoh eiei halor kane ka kam,” ula bynrap.
U Myntri ula ong ba ka Sorkar ka dang ap ruh ïa ka rai jong ka Ïingkashari Supreme Court, haba bishar ïa ki jingai jingmut jong ka CEC ha kaba ïadei bad kane ka kam.
