Kyndang ka KSU ia ki bar jylla ki bym biang ki kot ki sla ha ki thain Nongjri

Mawkyrwat, Nailur 01 : Mynta ka sngi ka 1 tarik u ‘Nailur, 2025 ka Khasi Student’s Union (KSU) jong ka Langkynma Area Unit ki la leit ban kyndang naphang ia ki bar jylla kiba trei hapoh ki coke factory kiba don ha ka thaiñ Nongjri, South West Khasi Hills District bad pynher krad ia ki bym biang ki kot ki sla ha ka jingwan trei bylla.
Ïa ka kynhun la lam khmat da u bah Rockyfeller Dkhar, General Secretary, u bah Micheal Diengngan, Vice – President, bah Shanbor Marwein, Finance Secretary ryngkat ki dkhot ka seng.
U bah Rockefeller Dkhar haba kren sha ki lad pathai khubor u la ong ba ka jingthmu jong ka seng ban khynra ia kine ki coke factory ka long kum shibynta ban khanglad ia ka jingioh wan rung kyrthep ki bar jylla sha kine ki thaiñ bad kaba kham kongsan ka long ban peitngor ba ioh don ki nong Bangladesh kiba wan rieh tngen bad wan trei ha kine ki factory kaba lah ban wanrah jingma ia ka dong ka thaiñ kumba la jia ha kine ki khyndiat bnai ba ladep ha kaba ka ladon ka jingthombor jong ka kynhun pyntriem na Bangladesh ia ki shnong khappud jong ka South West Khasi Hills District.
Ha kane ka jingleit khynra ka seng kam shym la lap ïa ki nong Bangladesh hynrei ka lap ia kiba bun ngut ki bar jylla kiba wan ïalam ryngkat ïa ka lok bad ki khun ki kti, ki bym biang ia ki kot ki sla bad ka seng ka la beh krad bad pynphai noh ia ki sha ki jaka kaba ki wan.