Nongpoh, Nailar, 22: Kum shi bynta jong ka “Mera Resham Mera Abhimaan” (MRMA) kaba dang ïaid shakhmat kaba la lamkhmat da ka Central Silk Board (CSB), Ministry of Textiles, ka sorkar India, la pynlong ïa ka prokram ai jinghikai halor ki kam ri khñiang kumno ban sumar bad ban ïada na ki jingpang bad ïa kane ka prokram la pynlong ha Bhoirymbong, Ri-Bhoi District.
Ïa kane ka prokram la snohktilang lang da ka CSB, Muga Eri Silkworm Seed Organization (MESSO), P-3 Unit, Nongpoh, ryngkat ka jingïatreilang bad ka Ophis jong ka District Sericulture, Ri-Bhoi, bad la sakhi ïa ka jingïashim bynta shitrhem jong ki 123 ngut ki nongri khñiang na kane ka thaiñ.
Ïa kane ka prokram la pynïaid da ka kong R.B. Lyngwa, District Sericulture Officer, Ri-Bhoi, kaba la ïaroh ïa ka jingïatreilang jong ka Central Silk Board bad ka tnad Sericulture jong ka jylla na ka bynta ban kyntiew naduh tynrai ïa kam ri khñiang ha kaba ka la pynpaw ruh ïa jinglah bad ka jingjop jong ka Ri-Bhoi ban kyntiew ïa ki kam ri khñiang bad pynshlur ruh ïa ki nongri ban pyndonkam ïa ki buit treikam katkum ka juk ba mynta kum ha ka jingri ïa u khñiang rusom khnang ban kyntiew ïa jingmih bad ka ïoh ka kot.
Ka thong jong ka Central Silk Board hapoh ka jingïalap jong ka MRMA la khmih lynti ba kin kyntiew shibun ïa ka jingpynmih ïa ki ksai ha Meghalaya bad ba ka jylla Meghalaya kan long ka nuksa sha kiwei pat ki jylla ha ka ri ha kaba ïadei bad ki kam pynmih ïa ki ksai na ki khñiang.
Lyngba katei ka prokram ka la long ruh ka jingmyntoi bad ka jingkyrkhu kaba khraw ïa ki nongri khñiang hadien ba ki riewstad bad ki ophisar ka tnad Sericulture ki la leit ban pynsngewthuh paidbah ïa rukom ri bad sumar ïa ki khñiang bad kumno ban kyntiew bad pyniar ïa jingpynmih bad da kaba pyndonkam da ki buit stad kiba thymmai katkum ka juk ba mynta na ka bynta ka jingmyntoi jong ki nongri bad kumjuh ruh ban kyntiew ïa ïoh ka kot jong ki lyngba ka kam ri khñiang.
