Ba ud ki nongshong dukan, jurip ka Kong Rona Khymdeit ïaka ophis u DTO ha Nongpoh, lap bun ki jingduna

Nongpoh, Nailar 14: Hadien ka jingud jingnam jong kiba bun ki nongshong dukan bad kumjuh ki paidbah halor ka jinglong jingman jong ka ophis u District Transport Officer ka Ri-Bhoi District kaba don haka shnong Umlyngkdait, ka kong Rona Khymdeit kaba dei ka Vice Chairman jong ka Public Grievances Committee jong ka sorkar jylla kaba dei ruh ka MDC jong ka Nongpoh, mynta ka sngi kala leit ban jurip syndon ïakatei ka ophis ban lap ïaki jingduna jong katei ka ophis kumba la ujor da ki paidbah.
Kum ban shu pynpaw hangne ba ka kong Rona Khymdeit kala wan ruh ban ïakynduh dang shen ïa u Myntri ka tnad Transport, u Bah Sniawbhalang Dhar ban pynsngew ïaki jingduna ha katei ka ophis sorkar bad mynta ka sngi kala leit syndon dalade ban lap dala ki jong ki khmat ïaka jinglong jingman jong katei ka ophis sorkar ha kaba la lap shibun ki jingduna kum ka um, ka jaka leit shabar, ka building kaba dei ka jaka treikam jong katei ka ophis bad kiwei kiwei.
Naka liang ka Kong Rona Khymdeit haka jingsynran lang ki nongïalam ka party NPP na Nongpoh, ki nongshong dukan kila leit ruh ban ïakynduh ïa u District Transport Officer u Bah I Kharmon bad kumjuh ruh ïa u MVI ban ïakren halor kitei ki jingduna, bad ki jinglong jingman jong katei ka ophis mynta.
Haba kren sha ki lad pathai khubor naka liang ka kong Rona Khymdeit kala ong ba ha katei ka jingjurip jong ka bad ïaid sawdong jong katei ka ophis sorkar la lap shisha ïaki jingduna bad la donkam ban pynthymmai naduh ka building, ka phyllaw, ka um bad kumjuh ruh ka jaka leit shabar kaba biang bad ka pynpaw ruh ïaka jingsngewnguh ïaka sorkar NPP kaba la aibor ïaka ban leit jurip ïa katei ka ophis bad kum ka Vice Chairman jong ka Public Grievances Committee kan sa leit rah ïakatei ka jingeh sha ka sorkar ba kin thawlad kumno ban pynbiang ïaki jingduna ha katei ka ophis.
Naka liang ki nongshong dukan kila pynpaw ruh ba katei ka ophis ka dei ka jaka kaba ki nongleit nongwan ki ju rung ju mih kaba ai jingmyntoi shibun ïaki nongshong dukan ba la donkam bna pynbha ïaka surok, bad ban pynbiang bad pynitynnad ïaki jingdonkam ha katei ka ophis.