Nongpoh, Nailar, 10: Ka MDC jong ka Nongpoh Constituency Kong Rona Khymdeit ha ka Sngi Saitjaiñ ka la leit ban jurip ïa kawei ka skul Sorkar ha ka shnong Mawphru Mathan hadien ka jingleit shim bynta jong ka ha ka Women’s Week ne ka taiew ki longkmie jong ka Jingïaseng Kynthei Balang Presbyterian Mawphru.
Ha ka jingjurip ïa ka skul Mawphru Government LP School kaba la seng naduh u snem 1964 bad kaba la don mynta la 61 snem la sakhi ba ka jinglong jingman jong ka skul ka la long kaba isangsot wat tang ban peit, namar ka jingjot rathai kaba la long kum ka sem ba la shah ieh shrah.
Haba ïadei bad ka katei jingjot rathai jong katei ka skul na ka liang u Bah Devidian Mangu, Rangbah Shnong, ryngkat u Bah Sbun Damlong, President ka Managing Committee jong katei ka skul, ki la pynsngew sha ka MDC, ba kan leh eiei ne ban pynkren lem sha ki bor ba kham shalor, khnang ba katei ka skul kan ïoh ïa ki jingïarap na ka sorkar, namar katei ka skul ka long kawei na ki shlem ai jinghikai kaba kaba bun ki khynnah pule.
Ka kong Rona Khymdeit kum ka MDC tang hadien ka jingïohi da la ki jong ki khmat ïa ka jinglong jingman jong katei ka skul, ka la pynpaw ka jingsngewkhia namar ka dei ka shlem pule kaba phrang jingnang jingstad ïa ki khynnah katei ka shnong bad ka la ïakren ruh ïa u myntri ka tnad pule puthi ka jylla, u Rakkam A Sangma ban kyrpad ba ka sorkar ka dei ban leh eiei halor katei ka skul bad ban pynïoh ki lad jingïarap ba kyrkieh na ka bynta ka jingbit jingbiang jong ki khynnah pule ha katei ka shnong.
