Nongpoh, Jylliew 25: Tang hadien ba ka Dorbar Shnong Nongpoh ka la dep ban pynthymmai biang ïa ki nongïalam shnong kata naduh u Rangbah shnong, Secretary Shnong bad ki Rangbah dong bad na ka bynta ban pynskhem ïa kine ki nongïalam shnong u Sirdar ka Nongpoh Elaka Sirdarship mynta ka sngi u la wan ban pynkup da ka spong ka phali ïa u Rangbah shnong ba thymmai ryngkat ka sanat kaba pynthikna ba u la dei u rangbah shnong ba pura ka Shnong Nongpoh.
Haba aiti ïa ka Sanat bad ban pynkup ïa ka spong ka phali la pynlong ha ka jingïalang kaba la long ha ïing dorbar Hall, Sajer Nongpoh ba la wan hi da u Sirdar ka Elaka Nongpoh Sirdarship, u Bah Wanphrang Syiem ryngkat ka jingdon lang u Secretary ka Hima, u Bah Stoin Syngkli, ki myntri ryngkat ki nongïalam shnong bad ki paidbah nongshong shnong ka shnong Nongpoh.
Kumba la pynpaw da u Sirdar ka Elaka Nongpoh Sirdarship, u Bah Wanphrang Syiem, u la pynpaw ba kane ka jingpynkup ïa ka spong ka phali bad ka jingaiti ïa ka Sanat sha u Rangbah shnong ka Nongpoh, u Bah Silvester Mynsong kum u Rangbah shnong ba pura ka Nongpoh, ka dei katkum ka kyndon ba la pynkup bor da ka District Council bad shisien ba la pynkup bor kum u Rangbah shnong bad ki nongïalam shnong ki lah ban pyntreikam ïa ki kam shnoing kiba dei katkum ka riti ka dustur.
La sakhi lang ruh ha kane ka sngi ba la pynkup bor ïa u Bah Silvester Mynsong kum u rangbah shnong ba pura ka Nongpoh, da ka jingdon lang u Secretary Shnong, u Samla Anthony Suchiang, u Bah Michael Kharhunai, ki Longkmie Longkpa, ki samla bad ki nongïalam ka shnong ha ryngkat ki nongmihkhmat na ka it ka hima jong ka Elaka Nongpoh Sirdarship.
Haba ai jingkren ha kane ka sngi, u Sirdar ka Elaka Nongpoh Sirdarship, u Bah Wanphrang Syiem u la pynpaw ka jingkmen ba ki paidbah ka shnong Nongpoh ki la lah biang ban pynthymmai ïa ki nongïalam shnong khlem kano kano ka jinghuri hura bad kumba paw shabar ki don ïa kata ka mynsiem jong ka jingïatylli kaba donkam eh ban wan rah hapoh ka shnong ka thaw na ka bynta ban pynneh ïa ka riti ka dustur bad ruh ban wan rah ïa ki jingmyntoi jong ki paidbah ha baroh ki liang.
U la kyntu ruh da kaba ong ba kane ka jingpynkup bor ïa u rangbah shnong ka dei katkum ki kyndon jong ka aiñ ba la pynkup bor da ka sorkar bad kum ki nongïalam shnong ki don ïa ka hok ban pynïaid beit pynïaid ryntih ïa ki kam shnong bad kum ki paidbah nongshong shnong ruh ki donnkam ban ai ka jingïatrei lang na ka bynta ban wan rah ïa ka shongsuk ka shongsain bad ruh ki kam pynroi bapher bapher ki ban ai jingmyntoi ïa ki paidbah nongshong shnong.
Na ka liang u Rangbah shnong ba thymmai, u Bah Silvester Mynsong uba la shim ïa ka kyrdan rangbah shnong la saw sien kynthih, u la pynpaw ka jingkmen ïa ki paidbah nongshong shnong bad ha kawei ka bynta pat u pan ka jingïatrei lang hapoh ki ka shnong ki kam thaw, namar tang u Rangbah shnong bad ki dkhot jong ka shnong kin nym lah ban pyndep ïa kiba bun ki kam, hynrei donkam ban don ka jingïatrei lang khnang ba kino kino ki kam kiba thmu ban leh kan long na ka bynta ka jingmyntoi jong ki paidbah ka shnong.
