134th IndianOil Durand Cup 2025 : Mynta yn sdang ka Lajong ïa ka Group E pyrshah ïa ka kynhun shipai na Malaysia

Shillong, Naitung 25: Ka Shillong Lajong FC, ka klob kaba baroh ki trai Jylla Meghalaya ki ieid bad sngewtynnat kan ïoh ban sdang ïa ka jingïalehkai jong ka 134th IndianOil Durand Cup ha kane ka sngi Saitjaiñ (26 tarik, Naitung) pyrshah ïa ka kynhun shipai na Malaysia ka Malaysian Armed Forces (ATM FA), ha Jawaharlal Nehru Stadium, Shillong.
Kane ka jingïalehkai kan sdang ha ka por 4 baje janmiet, hadien ka jingïalang plie pyrda ïa ki jingïalehkai jong ka Group E ki ban pynlong ha Shillong da u Myntri Rangbah ka Jylla u Conrad K Sangma.
Kane ka klob I-League jong ka thaiñ kan khmihlynti ban tei biang ïa ka jingïalehkai ba seisoh jong ka kumba la jia ha ka Durand ha u snem 2024, ha kaba ka la pynkyndit ïa ka East Bengal ha ka jingïakhun quarter-final shuwa ba kan liem noh ha ka semi phainal pyrshah ïa ka NorthEast United FC kaba la rah ïa ka nam lahduh ha kaba kut.
Ka Shillong Lajong ka kynthup ïa ki rangïalehkai trai ri ba dang samla kiba don sap kumjuh ruh bad katto katne ki kyrteng kiba la paw. Ka bynta ba hakhmat jong ka kynhun yn ïalam da u Douglas Tardin, bad la khmih lynti ba ki khlur ïalehkai na kane ka thaiñ ruh, kynthup ïa u Figo Syndai, u Phrangki Buam, bad u Kenstar Kharshong kin shim ïa ka bynta ba kongsan ha ka kynhun.
“Ngi sngewkmen bha ban ïalehkai ïa ka jingïalehkai ba nyngkong jong Ngi ha ka Durand Cup ha la ïing. Ka kynhun ka la pynkhreh bha bad ka thrang ban aiti lut ïa lade. Ka jinglong jingman ha ka por kilanmet ka long kaba bha shibun, ki khynnah shynrang ki la minot bha, ki pynleit jingmut, bad ki long kiba kloi ban kiew shaphrang,” la ong u Birendra Thapa, Head Coach jong ka SLFC.
Katba ka kynhun liang pyrshah jong ki, ka Malaysian Armed Forces, kan ïashim bynta ha ka Durand Cup ha ka sien kaba nyngkong eh. Da kaba mihkhmat ïa ka tnad shipai jong ka Malaysia, la khmih lynti ba ka kynhun kan wanrah ïa ka jinglong kaba ryntih, kaba met kaba shait kaba khlaiñ, bad ka jingkhlaiñ ha ka jingïalehkai jong ki, kaba pynlong ïa ki kum ka kynhun ba lah ban long kaba jwat na ka bynta kano kano ka liang pyrshah.
Haba kren ha ka sngi shuwa ka jingïalehkai, u Assistant Head Coach jong ka Malaysian Services FT u Masrizar bin Mizalan u la ong, “Ngi khmih lynti ban sdang ïa ka jingïalehkai Durand Cup jong Ngi. Ka long barabor kaba kyrpang ban mihkhmat ïa ka Malaysian Armed Forces ha ki lympung ïalehkai bar ri. Ka kynhun ka la trei shitom bha, bad ki rangïalehkai ki don ka jingangnud ban lehkai bha. Ka thong jong Ngi ka long ban pyntreikam ïa ki jingthmu jong Ngi bad ban ïalehkai ïa ka phutbol kaba beit bad kaba ryntih.
Da ka jingdon lang jong ka NorthEast United FC bad ka Rangdajied United FC ha ka Group E, kawei pa kawei ka poiñ ka long kaba kordor.
Ka Lajong kan khmihlynti ban ïoh ïa ka jingsynshar mar ïa sdang ïa kane ka Group da ka jingjop, katba ka kynhun shipai na Malaysia kan kyrmen ban wanrah ïa ka jingktah kaba jur ha ka sien ba nyngkong ba ki ïalehkai ha ka Duran Cup.
Baroh 43 tylli ki jingïalehkai jong ka 134th IndianOil Durand Cup yn pyni paidbah (LIVE) lyngba ka Sony Sports Network (Sony Ten 2 HD) bad kumjuh ruh ha ka SonyLiv OTT.
Ka Durand Cup ka dei ka lympung phutbol kaba la rim tam ha Asia bad kaba lai ha ka pyrthei. La pynlong ïa ka da ka Indian Army na ka bynta lai tylli ki tnat shipai, bad ka la kylla long kum ka rynsan kaba pynmih ïa ki nongïalehkai phutbol ba tbit tam jong ka India la palat shispah snem.