Plie paidbah u President ka MFA ïa ka Mairang Super Leauge – 2025

Mairang, Naitung 25: U President ka Meghalaya Football Association (MFA) u Bah Hamletson Dohling, ha ka 24 tarik Naitung sngi Palei u la plie paidbah ïa ka lympung phutbol kaba la tip da ka Mairang Super Leauge 2025.
ïa ka jingïalang ban plie paidbah ïa ka Mairang Super Leauge la pynlong ha madan Dommawlum, Pyndenumiong Mairang ha kaba ki don baroh 10 tylli ki club kiba ïa shim bynta ha kane ka lympung.
Hashwa ban sdang ka jingïalehkai, u Bah Hamlet kum u kongsan u la ïoh ban aiti ruh ïa ka kali kit nongpang (Ambulance) sha ka Pyndenumiong District Sport Associations (PDSA) ïa kaba u la pynïoh lyngba ka Chief Minister Special Development Fund (CMSDF).
Haba kren kum u kongsan u Bah Hamlet u la ai khublei ïa ka PDSA kaba la shimkhia ban pynlong ïa kane ka lympung kum shi bynta ban plie lad ïa ki khun samla jong ka dong ka thaiñ kiba don ïa ka sap ïalehkai ba kin dang kiew shaphrang ha ka jingïalehkai ka jong ki.
U la pyntip ruh ba ki don kumba 10 tylli ki club kiba ïa shim bynta ha kane ka lympung bad ka club kaba ïoh ban rah ïa ka nam lahduh kan ïoh ban mih khmat ïa ka PDSA sha ka Meghalaya State League (MSL), kaba dei ka lympung ba heh tam jong ka Jylla.
Shuh shuh u la bynrap ba ka jylla Meghalaya ha u snem 2027 kan ïoh ban pynlong ïa ka National Games, kumta na ka liang jong ka MFA ka la trei shitom bha bad leit shang kylleng ki jaka nongkyndong ban wad ïa ki samla donsap ha ka kam ïalehkai bad yn thung ruh ïa ki nonghikai lane ki coach ba tbit namar ba ki thrang ba ka jylla Meghalaya kan tyngshaiñ ha katei ka Games.
Haba kren halor ka jingaiti ïa ka Ambulance u Bah Hamlet u la ong ba ha man la ka jingïalehkai ki ju don ki khep ba ki don ki jingmynsaw ïa ki rang ïalehkai bad lyngba kane ka Ambulance kan ïarap ban pynkit mar mar ïa ki player sha jaka ai jingsumar haba ki don ki jingjia ba mynsaw ki player.