Jowai, Naitung 24: Ka Dorbar Lyiur jong ka Jaiñtia Hills Autonomous District Council (JHADC) kaba la long ha ka sngi Palei ka la poi noh sha kaba kut mynta hi ka sngi, ïa kane ka Dorbar la pynïaid da u Deputy Chairman ka JHADC u ma Wailad Dameshwa Siangshai (MDC).
Hashwa ban wan ka kynta kylli jingkylli na ka liang ki MDC ka liang pyrshah ki la pyrshah jur, halor ka jingbym wanrah ïa kiba bun ki jingkylli hapoh ka ïing Dorbar kiba dep ban submit na ka liang jong kitei ki MDC.
Haba poi sha ka kynta kylli jingkylli tang 4 ngut ki MDC ka liang pyrshah kiba la ïoh ban kylli jingkylli mar 3 tylli kiba kynthup ïa u ma Awhai Andrew Shullai, ka kong Laiawanlamjinghun Khyriam, ma Madonbai Rymbai bad u ma Rikut Parein. Katba kiwei ki MDC 6 ngut na ka VPP kim shem la ïoh lad shuh ban kylli ïa ki jingkylli namar bala pynkut noh ïa ka Dorbar.
Ha kane ka sngi la wanrah ruh ïa ka Report treikam ka Comptroller and Auditor General of India na ka bynta u snem 2017-2018, 2018-2019, ïa kaba la pynsngew da u CEM ma Thombor Shiwat. Na ka liang ki para MDC ki la ai jingmut nangne shakhmat dei ban pynthymmai bad ban pynbha shuh shuh ïa kane ka CAG lyngba ka Public Account Committee jong ka Council.
La ai jingmut ruh ban pynduna ïa ka rukom pynlut pynsep ïa ka pisa da kaba pynduh ïa ki Committee kiba ym sngew donkam, la ai jingmut ruh ban pynmih khajna lyngba ki ïew ki hat da kaba buh ïa ka dor kaba biang ha ka por ba thep tender.
U CEM ka JHADC ula pynsngew ruh ïa ka Official Report ban pynkiew kyrdan ïa ki saw ngut ki ophisar jong ka Council katkum ka Rules 29 (1) 2 jong ka Assam and Meghalaya Autonomous District (Constitution of District Council) Rules 1951.
Ha ka juh ka por kum ka dak ban kynmaw burom ïa ki arngut ki MDC barim kiba la khlad noh kata ïa u (L) Kiton Samati bad u (L) Laitsingh Shylla, la pynlong ka jingsngap jar kaba shipor bad ka jingkren sngewlem da ki para MDC, ha ka juh ka por la rai ban phah ruh ïa ka khubor jingsngewlem sha kiba ha ïing.
Ha kane ka Dorbar la wanrah ruh ïa ka mat ïatai (motion) ban pynbha ïa ka rukom treikam ka Council da u MDC ka War Central ma Jamshaphrang Pohtam, kaba ïadei ban pynkhlaiñ shuh shuh ïa ki ïew jong ka Council naduh ki jaka nongkyndong bad kumjuh ha sor, kiba bun na ki MDC khamtam na ka liang pyrshah ki la ai jingkyrshan ïa kane ka Motion ban kyntiew ïa ka pliang ja jong kiba bun ba lang.
La pynsngew kane ka aiñ ka la don lypa naduh u snem 1975 kaba la kynjoh sha ka 50 snem mynta bad kaba dang sah kumjuh hi, kumta la ai jingmut ban plie thymmai ïa ki ïew hapoh ka Council, kumjuh ïa ki ïew ha ki jaka khappud khnang ban kan ïarap ïa ki nongrep, ki nongshongïew bad ïa kiwei de. Ha kaba ïadei bad ïew Jarian kaba la khang mynta la ai jingmut ban plie nong ïa ka da ka jingkren pynbeit ki MDC ka thaiñ War Jaiñtia.
Hadien ka jingpynshai na u EM ba dei peit ïa ka tnad ïew u ma Seiborlang Shadap, ula ong ba ka EC ka la leh ïa kaba bha tam na ka bynta ka jingbha jingmiat jong ki ïew hapoh ka Council, naduh ka jingwanrah ïa ki skim na ka sorkar jylla ban shna ïa ki ïew, ka jingpynrung ïa kiwei de ki ïew hapoh ka Council, ka jingpynkiew ïa ka dor jong ka bai Permit na ka 700 sha ka 1300 tyngka ha ka shisnem, ka jingpynbun ïa ki dukan hapoh ka Iawmusiang Complex, nalor kiwei kiwei de. Na ka liang utei u MDC ka War Central ula weng noh ïa katei ka Motion bala wanrah bad la pynkut noh ïa ka Dorbar Tlang mynta hi ka sngi.
