Mawkyrwat, ‘Naitung 24 : Ki Pulit jong ka Ranikor Police Station lyngba ka jingïarap jong ki Pulit ka Rongra Police Station bad CI Baghmara hadien ka jingbud-dien ïa ka jingjah jong ka kali kamai Tourist S-Presso rong rupa kaba don ïa u number ML 05 AE 7933 na Rilang-Ranikor, Ranikor Civil Sub Division ki la ïoh kem noh ïa ar ngut kiba donkti ha kam tuh kali.
Katkum ka khubor na u Superintendent jong ki Pulit ka South West Khasi Hills District, la ong ba hadien ka jingwan ujor ehjahar jong u Fulmark Kharsaw Lyngdoh, 29 snem na ka shnong Rilang-Ranikor ba ka kali maruti suzuki jong u kaba don ïa ka number ML-05-AE-7933 (S-presso) ka rong rupa ka la shah tuh na Rilang-Ranikor na ka jaka pynïeng ha ka 23 tarik mynta u bnai ha ka por kumba 12:00 baje shi teng synnia, mar mar ki Pulit ki la pynlong ka jingtohkit ban wad ïa kane ka kali.
Kumta, dei ha kane ka janmiet jong ka 24/07/2025 da ka jingïarap jong ki nongtrei jong ka Rongra Police Station bad CI Baghmara la lap ïa katei ka kali bad la kem ïa ki nongtuh ïa katei ka kali.
Ki ar ngut kiba suba donkti bad kiba la shah kem noh ki long u Ardison R. Marak 25 snem ka rta na Bagli, South West Khasi Hills District bad u Alias Raning D. Shira 25 snem ka rta na Mawpyllun, South West Khasi Hills District hapoh ka Ranikor Civil Sub Division bad ka jingtohkit ïa ki ka la ïaid shakhmat.
Kumban shu kdew hangne, u bah Fulmarkstar Kharsawlyngdoh na ka shnong Phlangmawprah kaba hap hapoh ka Ranikor Civil Sub Division uba dei u trai jong ka kali, haba kren ha ki lad pathai khubor ha ka por mynsngi u la ïathuh ba kali Tourist S – Presso rong silver kaba don ïa u number ML 05 AE 7933 ka la shah rong tuh ha ka shiteng jong ka miet 22 tarik mynta u bnai katba u trai u dang pynïeng harud surok ha ka shnong Rilang, Ranikor Civil Sub Division, South West Khasi Hills District.
Shwa kata shwa, u la ong ba ha ki por 6 baje ei ei janmiet u dang wan phai na Ranikor bad hadien kata u ai noh ïa u shabi ha u khun pyrsa ban leit buh bad ïa lade u hiar noh sha wah ban leit tong dohkha.
Ynda kham katto katne por, u la wan phai noh na kaba tong dohkha bad ka dei artad ha ka por 9 baje ei ei janmiet bad ynda u la poi ha iing u la bam ja bad namar ka jingshit palat u shim ïa ka kali bad u leit ha kham pajih ban pynpyngngad ïa lade.
“Ha ka por 11 baje ei ei u la leit phai noh sha iing bad leit thiah noh, bad kumba ju long man ka por ïa ka kali u pynïeng beit ha ka jaka ba u ju pynïeng manla ka por”, ïathuh u bah Fulmarkstar. Phewse, ha ka step kaba bud haba u la khie bad leit peit ïa ka kali kam don shuh ha ka jaka ba pynïeng.
Namarkata, mar mar u pyntip ha kiba ha iing bad kylli la ki rah ne em ïa ka kali, hynrei ki la jubab, ’em’. Kumta ula pyntip ha ki paralok ryngkat ka jingpan jingïarap.
U bah Fullmarkstar Kharsawlyngdoh ha ka sngi kaba bud kata ka 23 tarik u la leit ban ujor da ka ejahar ha Ranikor Police Station.
